Mendetasuna duten adineko getxoztarrak zaintzeko 25.000 euro inbertituko dituzte
Bizkaiko Foru Aldundiak eta Getxoko Udalak 24.992 euroko inbertsioa dakarren Zainduz programa berretsi berri dute. Programa horrek boluntariotza sustatzen du mendetasuna duten adinekoak zaintzeko, eta laguntza psikosoziala eskaintzen die haien zaintzaileei, foru iturriek adierazi dutenez. Zehazki, pasa den urriaren 23an, Bizkaiko Foru Aldundiaren Gobernu Kontseiluak erabaki-proposamen bat onartu zuen Aldundiaren eta Getxoko Udalaren arteko lankidetza-hitzarmena sinatzeko. Zainduz programa ia-ia Bizkaiko Lurralde Historiko osora zabaldu bada ere, eskualdean Leioa da, Getxorekin batera, hitzarmena sinatuta duen udalerri bakarra. Hitzarmen horien helburua familia-inguruneko mendetasun egoerei arreta emateko foru programa garatzea da; horretarako, adinekoak zaintzen dituzten pertsonei prebentzio jarduerak, boluntariotza jarduerak eta laguntza psikosoziala eskainiko zaizkie, Aldundiak gogoratu duenez. Argazkia: © Leioa.net.
Gaur egungo testuinguruan, mendetasuna duten adinekoen eta haien familien lehentasunak aldatu egin dira. Asko dira euren etxeetan edo, behintzat, euren familia eta gizarte ingurunean egoten jarraitu nahi duten pertsonak. Bizkaiko Foru Aldundiaren iritziz, familiek eta hurbileko pertsonek "adinekoei ematen dieten zaintza eta laguntza on soziala da", eta herri administrazioek sustatu egin behar dute. Gizarte Ekintza Sailak, "Zainduz" deritzon programaren barruan, zenbait egitarau garatzen ditu adinekoen mendetasunari familia-ingurunetik heltzeko. Programaren helburua da mendetasuna duten adinekoak familia-ingurunean zaintzea, eta, horretarako, adinekoak zaintzeko aukera eta –aldi berean– familia eta gizarte ingurunean geratzeko aukera ematen duten prestazioak identifikatzea eta zehaztea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun