"Errimak Oinetan" dantza eta bertso ikuskizuna taularatuko dute larunbatean Sopelan
Bertsolariek sentipen eta emozioak sentiarazten dizkiete entzuleei. Eta entzule horiek dantzariak balira? Nola adieraziko lukete belarrietatik jasotako zirrara errimatua oinen bidez? Galdera horren erantzuna da Haatik dantza konpainiaren "Errimak Oinetan" ikuskizuna, bertsolaritza oinarri duen dantza emanaldia: dantza berriak, bertsoei jarriak! Ikuskizun berritzaile hori Sopelara helduko da larunbat honetan, azaroak 10. Hitzordua 20:30ean izango da, Kurtzio Kultur Etxean, eta sarrerak daborduko eros daitezke, sei euroan (udaletxean, Kultur Etxean eta Larrabasterrako Sopelarin bulegoan). Bitartean, Aitxu! Sopelako euskara taldeak ohiko erromeria antolatu du ostiralerako, hilak 9. Hitzordua 19:00ean jarri dute, Udaletxeko plazan (euria egiten badu frontoian). Bertan, dantzaldi gidatua egingo dute. Ekimen horrekin euskal kultura kalera ateratzeaz gain, euskara erabiltzeko eremuak zabaldu nahi dituzte. Argazkia: © Haatik dantza konpainia.
Unai Elizasu eta Aiert Beobide dira larunbateko ikuskizunaren zuzendariak, eta Sustrai Kolina bertsoen egilea (hasierako agurrak, bakarkakoa, taldeetakoa eta puntutakoa). Bertsoak entzuteaz gain, "Errimak Oinetan"-en hainbat kantu entzuteko aukera izango da, egile ezagunek egindakoak: Mikel Urdangarin, Katamalo, Aitor eta Jon Sarasua, Gu ta Gutarrak, Maddalen Arzallus eta Miren Amuriza. Eta noski, lehen mailako dantzariak ere izango dira: Aiert Beobide, Maitane Mujika, Onintza Odriozola, eta abar.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun