Hamaika urte bete dira gaur, azaroak 7, ETAk Jose Maria Lidon Corbi Bizkaiko Auzitegiko Bigarren Aretoko magistratua Algortako bere etxeko garajean hil zuenetik. Hori dela eta, Bilboko Justizia Jauregian lore eskaintza egin dute gaur goizean haren familiako kideek, lagunek eta lankideek. Besteak beste, epailearen alarguna eta seme-alabak izan dira bertan. Juan Luis Ibarra EAEko Justizia Auzitegi Nagusiko buruak ere parte hartu du omenaldian. Horren hitzetan, biktimak gogoratzeak ''zentzua ematen dio elkarbizitzari''. Epailearen lankideek "demokraziaren defentsa" egin dute, eta "Euskadin bakea sendotzeko legezkotasuna errespetatu eta oroimenean oinarritutako historia eraiki behar dela" esan dute. Argazkian, Bildu koalizioak bere jarrera argi utzi ostean, EAJ, PP —Marisa Arrue bozeramailea falta zitzaien— eta PSE-EE alderdiek parte hartu zuten 2011ko abenduaren 2an Getxoko Udalak deitutako "terrorismoaren biktimak" omentzeko ekitaldi instituzionalean.
Lidonen hilketan lagundu zuelakoan, Orkatz Gallastegi berangoztarra zigortu zuten, nahiz eta Amnistiaren Aldeko Mugimenduak hainbatetan salatu frogak eta epaiketak "muntaia" zirela, Estatuak "norbait" zigortu bide zuelako: "Orkatz hasieratik zegoen kondenatuta. Horretarako atxilotu zuten. Lidon ustez hil zutenak hilak ziren, eta errudun zuzenen bat behar zuten, bide batez, Lidonen familiarrek kasu hauetan errudunei aplikatzen zaien 'erantzukizun zibila' jasotzeko. Eta Orkatz hautagai ona zen Ertzaintzarentzat, Eusko Jaurlariarentzat. Eta hor dago, espetxean, Ertzaintzak, Eusko Jaurlaritzak, Espainiako auzitegiek, Espainiako Gobernuak, dirua legezko itxurak eginez kobratu beharrak, 'El Correo'k eta bestek kondenatuta". Urtzi Murueta leioaztarra ere auziperatu zuten arren, Lidonen hilketarekin zerikusirik ez zuela izan berretsi zuen Espainiako Auzitegi Gorenak.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.