Gaur, osteguna, Huts Teatroa konpainiak sortu duen "Publikoari gorroto" antzezlana eskainiko du Kultur Leioako Auditoriumean, arratsaldeko 8:30etik aurrera. Obraren protagonista Ander Lipus aktore ezaguna da eta berarekin Iñaki Ziarrusta eta Miren Tirapu arituko dira euskarazko lan horretan. Manex Fuchs-en zuzendaritzapean, aktoreek Xabier Mendiguren Elizegik 1985an idatzitako antzezlan punk-a taularatuko dute, idazlearekin adostutako hainbat moldaketa sartuta. "Aktore bat, bi ikusle, agertoki bat. Besterik ez du behar antzerkiak" dio lan horren sinopsiaren hasierak, baina euskal antzerki garaikidea poltsiko zulatuekin dabil, eta publikoa gose. Horrek ezin egona pizten du. Eta ezinegon hori "Publikoari gorroto" antzezlanean islatzen da. Izan ere, teatroari buruzko hausnarketa jostalari baten moduan hasten da obra, publikoarekiko keinuz eta umorez; pixkanaka, ordea, arimaren zoko ilunenak joango dira agertzen: krudelkeria, bortxa, botere-harremanak… giza izatearen amildegi ertzera iristeraino. Lana pasa den astean estreinatu zen Lapurdiko Luhuso herrian eta Leioako Artedrama arte eszenikoen plataformaren esku ari da herriz-herri zabaltzen. Gaur ikusterik ez duenak otsailaren 23ra arte itxaron beharko du berriz ere eskualdean ikusi ahal izateko. Data horretan Getxo udalerrian taularatuko dute. Argazkian, Ander Lipus aktorea obraren pasarte batean / © Ainhoa Resano - Huts Teatroa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun