Plentzia ta Gorlizko Gazte Asanbladak zabaldutako oharra:
Laster, azaroaren 20an, Ermitatze gaztetxean identifikatuak izan ziren 6 gazte epaituko dituzte. Bere garaian fiskaltzak zein etxeko jabeek (Inmaculada Uriarte Elortegui, Mª Nieves eta Marina Uriarte Argiarro) egindako zigor eskakizunak mantenduz. Hau da;
- Pertsona bakoitzeko 2196 euro (Fiskaltzak) x 6 = 13.176 euro.
- Pertsona bakoitzeko 6588 euro (etxeko jabeek) x 6= 39.528 euro.
Hasiera baten esan genuen moduan, berriz ere agirian gelditu da etxeko jabeen diruzaletasuna, hauen borondate eza akordioetara ailegatzeko eta hauen mendeku nahia. Inmaculada Uriarte Elortegui, Mª Nieves eta Marina Uriarte Argiarro “anderei” argi utzi nahi diegu epaiketa bai edo bai irabaziko dugula. Azaroaren 20an emaitza edozein izanda ere, Plentzia eta Gorlizko herriaren babesa gure aldekoa izango da. Guk “justizia anker” honen epai jasoko dugu baina zuek herriaren epaia. Hau da, guretzeko balio duen benetako epaia. Plentzia eta Gorlizko Gazteek, herriak, ez dute ahaztuko zuen mendeku nahia!
Bi herri hauen udaletxeek osatzen duten udal gobernuei dagokienez, eta batez ere, Plentzia Udalari dagokionez, epaiketa honen aurrean mantendutako distantziakidetasuna txalotu nahi dugu. Oso arro gaude gure Udalak izandako jarreraz, izandako pasibotasunaz. Aupa zuek! Jakin ezazue, azaroan ez dela arazoa amaituko eta gaztetxearen jabeei konponbidea ematea hein handi batean zuei dagokizuela. Hala ere, zuen erantzunen zain ez gara geldituko, bestela jai daukagu. Lehen zuen aitzakia lokal gabezia zen, orain lokal libreak dituzue. Zein da zuen aitzakia?
Hau esanda, mila esker babesa helarazi diguzuen guztioi. Besterik gabe, epaiketa guztien gainetik gaztetxearen alde lan egiten jarraituko dugu, Plentzia eta Gorlizko herriak eraldatzen jarraituko dugu, okupazioa delitua ez dela aldarrikatuko dugu eta gure ahotsa ozen entzun beharko duzue.
Gora Plentzia eta Gorlizko Gazte Mugimendua!
Gaztetxeak aurrera!
Gora delinkuentzia okupazioa delitua bada!
Azaroaren 20an epaituko dituzte Plentziako Ermitatze gaztetxean identifikatutako sei lagun
Plentzia ta Gorlizko Gazte Asanbladak (PGGA) zabaldu duenez, bi astearte barru, azaroaren 20an, epaituko dituzte Ermitatze gaztetxearen proiektuan parte hartu zuten edo babesa erakustera hurbildu ziren sei gazte, Bilbon. Ertzainek eta udaltzainek 2011ko abuztuaren 8an hustuarazi zuten Ermitatze gaztetxea, zazpi hilabetez zabalik egon ostean. Hain zuzen ere, 2012ko apirilean zentro sozialean identifikatuta izan ziren sei gazteen aurkako epaiketa irekitzeko aukera helarazi zieten Getxoko epaitegitik etxearen jabeei, eta haien erantzuna baiezkoa izan zen. Fiskaltzak egun bakoitzeko 12 euroko eta jabeek 36 euroko zigorra eskatzen diete sei hilabetetan zehar. Hau da, pertsona bakoitzeko 2.196 euro Fiskaltzak (guztira, 13.176 euro) eta 6.588 euro etxeko jabeek (guztira, 39.598 euro). Epaiketa salatzeko bi mobilizazio egingo dituzte: bata, hilaren 19an, 19:00etan, Plentziako Astillero plazan; eta bestea, hilaren 20an, 09:30ean, Bilboko epaitegi aurrean, epaiketa 10:00etan izango baita. Argazkian, ertzainek eta udaltzainek goizean Ermitatze gaztetxea hustuarazi ostean, berrehun bat uribekostarren babesa jaso zuen 2011ko abuztuaren 8an arratsaldean Plentzia eta Gorlizko gazte asanbladak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun