Lehenik eta behin gure elkartasuna adierazi nahi genioke gaur Barakaldon eraila izan den Amaia E.-ren sendiari eta bere gertukoei. Heriotza hau ez da halabeharrez gertatu, espekulatzaileen interesen menpe jarri dira herritarron eskubideak, baita bizia ere; norbaitek honen zalantzarik bazuen gaurko eguna zoritxarrez guztiz argigarria izan da. Diru publikoz erreskatatua izan den banka sektorearen desjabetzeen jarduera ankerrak hildako zuzena eragin du eta hilketa horrek erantzuleak ditu: banku eta kutxak daude batetik, eta bestetik, egoera hau ahalbidetu duen legedia garatu eta babestu duten alderdiak daude, zeinak, murrizketen bidetik, herritarrak babes sozial gabe uzten ari diren. Argazkian, Stop Desahuciosek elkarretaratzea deitu du etxebizitzaren aurrean 21:00etan “terrorismo finantzarioaren aurka”, Bilboko Branka agerkariak zabaldu duenez.
Ezin dugu desjabetze gehiagorik ematea onartu, pertsona guztion eskubideak errespetatuak izan behar dute, instituzioak ezin dute espekulatzaileen interesak menpe jarraitu. Euskal Herriko alderdi politikoei lehenbailehen egoera honekin amaitzeko neurriak hartu ditzaten exijitu nahi diegu; banka eta kutxek desjabetze guztiak bertan behera utzi behar dituzte, horretara behartu behar ditugu, mobilizazio sozialaren bidez.
Horregatik guztiagatik, gaur, Barakaldoko Justizia Jauregian 19:30etan egingo den elkarretaratzean parte hartzera dei egiten dugu.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.