Amaia Egañaren heriotzak ez du inor epel utzi. Etxegabetu nahi zuten 53 urteko emakumeak bere buruaz beste egin ostiralean Barakaldon. Larunbat goizean, berriz, pintadak agertu ziren Araba, Bizkaia eta Gipuzkoako zenbait bankuko bulegotan, espainolez eta euskaraz, bankuei "hiltzaileak" deituz, Egañaren hilketa eragitea egotzita. Egun berean heldu zen Kutxabank-en iragarpena: "hipoteka-betearazpenak berehala baina aldi baterako bertan behera utziko ditugu, araudi berriak hauen gainean izango duen eragina ezagutu arte". Hala ere, antza, emakumearen hilketak ez beste faktoreek ekarri dute BBK, Kutxa, Vital eta Cajasur banketxeek osatzen duten entitatearen erabakia: "Kutxabankek instrukzioak eman ditu hipoteka-betearazpen guztiak baliogabetzeko, behintzat araudi berriaren nondik norakoak ezagutu arte", adierazi zuen prentsa ohar bidez Mario Fernandez buru den finantza-erakundeak. Etxe kaleratzeen Espainiako legedia legez kanpokoa dela ebatzi du Europako Batasunak. Bestalde, Marta Uriarte Stop Desahucios Bizkaia elkarteko koordinatzailea Madrilera joango da gaur, PPren egoitza nagusiaren aurrean Amaia Egañaren heriotza salatzeko, Eitb.com agerkari digitalak aurreratu duenez. Uriartek azaldu duenez, Barakaldoko emakumeari egin dakiokeen "omenaldirik onena legea aldatzea da". Bitartean, Espainiako Gobernuak eta PSOEk "premiazko bilera" egingo dute gaur, "etxegabetzeen aurkako neurriak" adosten saiatzeko. Argazkian, Marta Uriarte Stop Desahucios Bizkaia elkarteko koordinatzailea Madrilera joango da gaur, PPren egoitza nagusiaren aurrean Amaia Egañaren heriotza salatzeko.
Dena dela, Kutxabankek argitu duenez, Mario Fernandez presidenteak hartutako erabakiak lehen etxebizitzaren gaineko hipotekei eragingo die. "Kutxabankeko ekimena da", argitu dute finantza-erakunde honetako iturriek. Bestalde, "etxegabetze traumatikorik" egin ez dituela azpimarratu du Caja Laboral-ek ohar baten bidez, eta "duela hainbat urte etxegabetzeak ekiditeko bitartekaritza barne protokolo bat" erabiltzen duela adierazi du. Horrela, zorra ordaindu ez dutenen familien egoeretan "akordioan oinarritutako prozesuak" abiatzen ditu finantza-erakunde honek, "diruaren itzulera egiteko epeak luzatuz edo hipoteka-betearazpena ez egiteko gainontzeko aukerak aurkeztuz". "Zorra kitatzeko azken aukera etxea bankuari ematea da", azpimarratu du Caja Laboralek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun