Datorren asteazkeneko bilera Urdulizko Udalak eta Behargintzak sustatu dute, eta biak ere hitzorduaz baliatuko dira merkatari eta ostalarien artean lotura moduren bat edo beste ezartzeak dituen onurak transmititzeko. "Izan ere, horrek euren baldintzak hobetu eta euren ekintzen ikusgarritasuna areagotuko luke", udal iturrien hitzetan. Jakina, saltokiek estrategia ezberdinak har ditzakete espezializazioaren, zerbitzuaren, prezioen eta abarren arabera, baina berezitasunak baino harago, Udalak merkatari eta ostalariei elkarte batean batzeko aukeraren abantailak erakutsi nahi dizkie, kontuan hartuta, krisiak, merkataritza-saltoki handiek edota kontsumo eredu berriek jardutea eskatzen diotela merkatari txikiari. Udalak uste du, eta horrela azalduko du datorren asteazkenean, "batera jarduteak edota gutxieneko masa kritikoa izateak nabaritasun handiagoa ekarriko lukeela". Gainera, erakundeetatik elkarrizketa bakar mota hori eskatu ohi da, eurek laguntzen dituzten proiektuak abiarazteko orduan.
Hori gutxi balitz, gaur egun dagoen laguntza publikoak, hala nola, Eusko Jaurlaritzaren Merkataritza Zuzendaritzaren Merkataritza Dinamizazioaren Dekretuak, tokiko elkarte bat egoteko beharrizana derrigorrezko egiten du. Horrek, era berean, merkataritza-ingurua hobetzeko finantziazioa jasotzen lagunduko lioke Udalari.
Laguntza merkataritzari
Toki mailan, Urdulizko Udala, Behargintzaren bitartez, jarduera ekonomikoak sustatzeko lan egiten ari da, batez ere, merkataritzaren inguruko jarduerak. Negozio berriei laguntza eskaintzen zaie eta lehendik ere badaudenak sendotzen dira. Prestakuntza ematen da, negozio planak egiten dira, diru-laguntzei buruzko kontsultak artatzen dira eta ekintza zehatzak gauzatzen dira. Zentzu horretan, Urdulizko Udalak, urte honi begira, merkataritzari laguntzeko programa bat dauka, udalerriko merkataritza eta ostalaritza sustatzea ahalbidetzen duten jarduerak egiteko.
Tokiko merkatari eta ostalariekin bilduko dira etzi Urdulizko Udala eta Behargintza
Urdulizko Udalak udalerriko merkataritza eta ostalaritza jarduera sustatzen jarraitu nahi du. Horretarako, sektorearen benetako egoera ezagutu eta hobetzen lagun dezaketen formulak bilatu nahi ditu. Adostutakoaren arabera, "egoera horren berri edukitzeko modurik onena da tartean daudenek euren beharrizanak eta kezkak adieraztea", adierazi dute tokiko iturriek. Horregatik, Urdulizko Udalak, Uribe Kostako Mankomunitateko Behargintzarekin lankidetzan (azken batean, eskualde osorako Enplegu eta Garapen Zentroa da), informazio izaerako batzar batera deitu ditu merkatari eta ostalariak, asteazkenean, azaroaren 14an, kultur etxean, 20:00etan. Azken hilabeteotan hainbat bilera izan dira herriko udal ordezkarien eta merkataritza sektorearen artean. Izan ere, "guzti-guztiek" uste dute "Urdulizko merkataritza-jardueraren osasun ona udalerriaren onerako izango dela". Argazkian, Urdulizko kultur etxean batuko dira Behargintzako eta Udaleko ordezkariak merkatariekin / © Urdulizko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun