Aurreko Kongresuan zabaldutako bideari jarraituz, euskaldun eta euskaltzaleen gizarte mugimenduak indartzeko apustuari eutsi diote oraingoan ere Topaguneko kideek eta horrela, euskaldunon komunitatea plazara ateratzeko beharra azpimarratu dute, elkarte bizitza herrira ateratzeko beharra.
Azaroaren 17an, gogoeta prozesuaren bukaera baliatu nahi du Topaguneak, halaber, azken hiru urteotako gogoetak gizarteratzeko, eta bazkideekin erabakiak hartzeaz gain, euskalgintzako eta gizarteko beste eragile batzuekin gogoetaren ondorioak konpartitzeko baliatuko du mugimenduak Euskalduna Jauregiko ekitaldia.
Topagunea Euskara Elkarteen Federazioa 1997an sortu zen, eta Araba, Bizkaia, Gipuzkoa eta Nafarroako 96 Euskara Elkartek osatzen dute. Elkarteon zein Federazioaren beraren helburua euskaldunon hizkuntza komunitatea indartzea da, euskararen erabilera sustatuz eta motibazioan eraginez. Horretarako, hainbat esparru lantzen dituzte, hala nola haur eta gazteen aisialdia, kulturgintza, tokiko hedabideak, mintzapraktika, entitateak euskalduntzea eta sentiberatzea.
“Federaziotik Mugimendura” izenburuko gogoeta prozesua burutuko du larunbat honetan, azaroak 17, Bilboko Euskalduna Jauregian, Topaguneak. Larunbateko saioarekin amaituko dute mugimendua osatzen duten ia 100 elkarteek 2010 urtean hasitako hausnarketa sakona. Azken hilabeteetan mugimenduaren antolakuntza, finantzazioa, barne komunikazioa eta jardunari lotutako gaiak landu dituzte Euskal Herri osoko hainbat elkartek eta, oro har, adostasun zabala nabarmendu dela azpimarratu dute Topaguneko ordezkariek. Larunbatean gogoetari amaiera emateaz gain, Zuzendaritzak proposatutako ponentzia eta ondorioak bozkatuko dituzte Kongresura bertaratuek. Dagoeneko dozena erdi dira Topagunean parte hartzen duten Uribe Kosta eta Erandioko euskaldunen elkarteak: Berbalamiñe, Berbots, Bizarra Lepoan, Boluntzarreta, Egizu eta UKBERRI.NET argitaratzen duen Ukberri Uribe Kostako Komunikabide Euskaldunak elkartea. Argazkian, 2011ko maiatzeko batzar orokorrean Rozio Luces Egizu Getxo Euskaldun! elkarteko dinamizatzailea Topaguneko Zuzendaritza Batzordeko kide aukeratu zuten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun