Azaroaren 16tik 24ra bitartean, 12. urteurrena ospatuko du Leioako Udondo gaztetxeak. Horrenbestez, ostiralean, hilak 16, kontzertua izango da, 21:00etatik aurrera, Alperrikako Bizien Jabe eta Lo Verde del Puerro ( Malsonado y compañía) kantautoreen eskutik. Larunbatean, hilak 17, gaztetxeen arteko topaketak egingo dituzte, jolasak, bertso-bazkaria, antzerkia eta kontzertuak izango direla. 21:00etatik aurrera, Distorsion eta Las Klitorix taldeak igoko dira Udondoko agertokira. Sarrera 6 eurotan izango da. Igandean, hilak 18, helduko da Uribe Kosta eta Erandioko gaztetxe beteranoaren 12. urtebetetzea. Egun horretan, txokolatada eta tertulia egingo dituzte, arratsaldez, "12 urte okupatzen eta autogestioa sortzen!" lelopean. Argazkian, kontzertua Udondo gaztetxean, artxiboko irudian / © Sobieth.
Hurrengo asteko ekitaldiei dagokienez, hilaren 20an, asteartea, Uribe Kostako Agroasanbladaren aurkezpena egingo dute, 19:30etik aurrera, Udondo gaztetxean. Hilaren 21ean, asteazkena, idazketa sortzaile eta txapa tailerrak izango dira, 19:30ean, Arkupe plazan. Hilaren 23an, ostirala, kalejira musikatua egingo dute, 19:30ean hasita, Perkudondo Brass Band taldearen eskutik. Horretaz gain, dantzariak eta kontzertu akustikoa egongo dira Bulebarrean. Amaitzeko, hilaren 24an, larunbata, goizez, "Gaztetxea kalera!" lelopeko jardunaldia prestatu dute. Horrenbestez, "slack line" (oreka zinta, erakusketa eta tailerra(, zirku tailerra (malabarismmoak, monozikloa, ...), aurpegi margotzea, serigrafia... egingo dituzte, 11:00etatik aurrera, Bulebarrean. Eta gauean, 21:00etan, gaztetxean izango dira kontzertuak gaztetxean: Memphis Belle (blues rock) eta talde gonbidatua (rock soul).
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun