Alain Goldaraz eta Leire Pinedo zinegotziek, Josu Landaluze bozeramaile jeltzaleak eman zuen arrazoi nagusia, hau da, berandu kontsultatu zietela, "gezurra" zela baieztatu zuten. Bilduren hautetsiek azaldu zutenez, "EAJ alderdiari ekainetik proposatu zitzaion banderaren inposizioaren gaia tratatzeko bilera bat. Jeltzaleek bilera hori atzeratu zuten. Urriaren 4an berriro ere Bilduk bilera eskatu zitzaien eta kasu honetan ere jeltzaleek hauteskunde autonomikoak pasatu arte atzeratu zuten. Bilera azaroaren hasieran burutu zen eta EAJ alderdikoek ez zuten bat egin hautetsien manifestuarekin baina ez zuten esan aurka bozkatuko zutenik". Bi zinegotzi ezkertiarrek adierazi dute batera erantzuteko saiakerak biderkatuko dituztela eta bide horretan jeltzaleei hartutako erabaki okerra zuzentzeko deia egin diete.
Larunbateko ekitaldiko bideoa (© Sopela.net)
Joan den larunbatean, 250 auzokide inguru batu zen Sopelako Udaletxeko plazan, Espainiako banderaren "inposizioa" salatzeko asmoz, Sopela.net agerkari digitalak zabaldu duenez. Ekitaldia agintaldi ezberdinetan egon diren 42 hautetsik deitu zuten. Historiaren pasarte gatazkatsu batzuei errepasoa egin eta gero, gaur egun Bilduko zinegotziak diren Alain Goldarazek eta Leire Pinedok sendotasunez kritikatu zuten azken osoko bilkuran EAJko ordezkariek hartu zuten erabakia. Udal batzar horretan, soinean ikurrina eta "Good bye, Spain" leloa irakur zitekeen pegatina zeramaten arren, bozketan, PSE-EE eta PPren ordezkariekin bat egin zuten zinegotzi jelkideek, Espainiako banderaren "inposizioaren" kontrako mozioari ezezkoa emanez. Ekitaldian ere, Sopelako gazteekin osatutako Ukan taldeak protagonismo berezia izan zuen: Ikurrinaren aferaren inguruan propio konposatutako abestia eskaini zuten. Azkenik, bildutakoek manifestazioa egin zuten, plazan amaitu, "Txoria tori" kantarekin, "inposizio" horri erantzuten jarraitzeko gonbidapena eginez. Argazkia: cc-by Sopelako Bildu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun