Etzidamu, osteguna, musikarien patroia den Santa Zeziliaren eguna dela eta, Areetako Andres Isasi musika eskolak bertako ikasleen musika emanaldia antolatu du bezperan, asteazkenerako. Aurten, eskolarentzat berezia den egun horretan elementu berria gehitu nahi izan dute, Gabon zuhaitz solidarioaren piztea. Ekimena arratsaldeko 7:15ean, abiatuko dute, zentroan bertan, jendarte-bazterkeria pairatzen duten pertsonen alde jarduten duen Sortarazi erakundearekin batera. Krisialdi ekonomikoaren ondorioz, Sortarazik hainbat urte darama Lamiakoko familien artean janari-sortak banatzen. Zerbitzu hori Bizkaiko Elikagaien Bankuaren laguntzari esker eman ahal izan da, baina laguntza hori murriztu egin da eta beharrak gora doaz. Horregatik, Musika Eskolak Gabon zuhaitz solidarioaren bidez janari-bilketa egingo du ostegunetik abenduaren 21era arte, eta ekimen horretan norberak bere ekarpena egitera gonbidatu du. Eskatutako elikagaiak honako hauek dira: arroza, lekaleak, esnea, galletak, atuna, kakao, pixoihalak, pasta, azukrea, irina, jarraipen-esnea, turroia, polboroiak, mantekatuak, olibak, hestebete paketatua, zainzuriak eta patea, besteak beste. Argazkian, Andres Isasi musika eskola iaz, 25. urteurreneko ekimenetako irudi batean / © Getxo.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun