Bizkaian akreditatuta dagoen Gorputz Kontsularreko berrogei bat kidek Erandioko Asuan dagoen Befesa enpresaren instalazioak bisitatu dituzte gaur goizean. Aipatu bisita Jose Luis Bilbao Bizkaiko ahaldun nagusiak eta Bilboko Merkataritza Ganberako ordezkaritza batek lagunduta egin dute. Befesa nazioarteko konpainia da, industria-hondakinen kudeaketa integralean espezializatuta dagoena. Erandion izan aurretik, kontsulei urtero burutzen den harrera ofiziala egin die Jose Luis Bilbaok Bilbon dagoen Bizkaiko Foru Aldundiaren Jauregian. Ahaldun nagusiak eskertu die kontsulei beste herrialde batzuekiko harremanak sustatzeko egiten duten lan "garrantzitsua", eta, horrez gainera, ahaleginak bateratzera animatu ditu, "beste merkatu batzuen interesa Bizkaira erakartzeko eta inbertsioa egiteko gune erakargarri bihur gaitezen lortzeko". Argazkian, harrera ofizialeko irudi bat / © Bizkaiko Foru Aldundia.
Ildo horretan, Bizkaiko agintari gorenak gogorarazi eta goraipatu du Bizkaiko enbaxadore gisa Gorputz Kontsularrak ia ehun urtean egin duen lana. Gaineratu duenez, lan horrek garrantzi handiagoa du gaur egun, krisialdia eta zailtasunak dauden sasoi honetan; izan ere, "denok batera lan egin behar dugu gure sare sozio-ekonomikoa berreskuratzeko eta hazkunde ekonomikoaren bidera itzultzeko".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun