Getxoko Udalaren Prebentziorako Zerbitzuak, Babes Zibileko Arloaren laguntzarekin, suteak amatatzeko eta eraikina husteko teknikei buruzko prestakuntza jardunaldi bikoitza antolatu du udaletxeko langileei zuzenduta. Jardunaldi bikoitza gaur ostegunean, hilak 22, eta bihar ostiralean, hilak 23, egingo dute, udaletxearen Babes Planaren harira. Horrek eraikinaren ezaugarriak, eskura dituen baliabideak, eta abar jasotzen ditu, larrialdi egoerei aurre egiteko, udal iturriek aipatu dutenez. “Udaletxe osoa hustu behar izatekotan langileek eta une horretan eraikin barruan izan litezkeen bisitariek bete beharreko jarraibideak finkatu nahi ditugu”, adierazi du Josu Loroño Babes Zibileko zinegotziak. Horretarako, bihar, 13:30ean, eraikinaren huste-simulazioa egingo dute, Udaletxea Babesteko Planak duen ezarpen-maila ezagutu eta aurki litezkeen akatsak zuzentze aldera. Hori dela eta, sute-simulazioa egiterakoan eraikineko barrualdean dauden pertsonen zein bertan lan egiten duten 66 beharginen erabateko laguntza eskatzen dute Prebentziorako udal Zerbitzutik. Argazkian, sute-simulagailua jarri dute udaletxe aurrean / © Getxoko Udala.
Suteak amatatzeko eta eraikinak husteko prestakuntza-jarduera horiek, baita simulazioa ere, beste udal egoitza batzuetan egin dituzte dagoeneko, esate baterako, Santa Klarako etxaldean. Horrez gainera, gaurtik eta biharko 13:30ak arte, sute-simulagailua egongo da kokatuta Algortako San Inazio elizako plazan, udaletxe aurrean bertan. Ibilgailu txikia da, benetako sua amatatzeko udal langileei praktikak egitea bermatzen diena.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun