Azaroaren 25a Emakumeenganako Indarkeriaren Kontrako Nazioarteko Eguna izanik, igande honetarako, hainbat mobilizazio deitu dute eskualdeko eragile feministek. Besteak beste, Leioako Bilgune Feministak deituta, kontzentrazioa egingo dute 13:00etan, Bulebarrean, "Emakumeon indarkeriaren aurrean, emakumeok iraultza!" lelopean. Algortan, 11:30ean jarri dute hitzordua Telletxe plazan, metroz danak elkarrekin Bilboko manifestaziora joateko. Aipatu martxa 12:30ean abiatuko da Arriagatik, A25 koordinatzaileak (Bilgune Feminista, Bizkaiko Emakumeen Asanblada, Feministalde, Mugarik Gabe, Mundubat, Euskadiko GGKEen Koordinakundea, CCOO, ELA, ESK, LAB, STEE-EILAS, Alternatiba eta Ezker Batua) eta Tribuna Feministak deituta. 15:30ean, berriz, pintxo-poteoa izango da Algortako tabernetan zehar, eta 18:00etan zine-foruma Abian Kultur Elkartean. Bestalde, Plentzia eta Gorlizko gazte mugimenduak ere deitu du kontzentrazioa. 13:00etan batuko dira Plentziako Pirulian. Argazkian, 2011ko abenduaren 13an, Leioako Bilgune Feministak eta Andrak emakumeen elkarteak deituta, egun batzuk lehenago 10 urteko neskato batek pairatutako sexu-erasoa salatzeko elkarretaratze isila egin zuten Bulebarrean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun