Aurreko urteetan, emakumeenganako indarkeriaren kontrako udal kanpaina gizonei eta etxeko gazteenei zuzenduta egon da Leioan. Aurten, herriko merkatariek ere parte hartu dute, biolentzia mota honen kontra egiteko. Guztira, Leioako 300 saltoki izan dira, Merkatarien Elkartearen laguntzarekin, Udalarekin lanean izan direnak. Elkarlan horren helburua da herriko kaleetan dauden dendak eta tabernak “gune seguru” bihurtzea, indarkeria jasaten duten emakumeentzat. "Hau da, edozein larrialditan herriko saltokietan babesa aurkituko dutela jakinaraztea, eta honetaz gain, merkatariek euren bezeroekin duten harreman estuaz baliatuz ezkutuan diren indarkeria kasu posibleak detektatzea", udal arduradunek azaldu dutenez. "Gune seguru" horiek zeintzuk diren erakusteko eta ikusgai egiteko, merkatari bakoitzak banderatxo bat jaso du saltokiaren kanpoaldean, eta barrualdean pegatina berezi batzuk dituzte larrialdi kasuetan nora deitu behar den jakiteko. Argazkian, aurrekoetan bezala, Bulebarrean egin dute gaur eguerdian emakumeenganako indarkeriaren kontrako elkarretaratzea.
"Saltokiak gure kaleetan gertatzen denaren lekuko aproposenak dira, kalean bertan biolentzia egoera bat gertatuz gero merkatariek badakite nora deitu behar duten, eta, honetaz gain, eguneroko bezeroekin merkatariek duten harreman estua, askotan ezinbestekoa da etxeetan jasaten diren eta ezkutuan diren biolentzia kasu posibleak detektatzeko", tokiko agintarien hitzetan. Guzti honengatik, Leioako merkatariek konpromisoa hartu dute Udalarekin batera, biolentzia kasuak ikusterakoan edo susmatzerakoan, batez ere emakumeen kontrako biolentzia eurek izaten baitirelako biktima ohikoenak, beharrezko pausuak emateko, eta egoera hori salatzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun