23.000 lagunek bisitatu dute atzo bertan amaitu zen Getxoko 11. Komiki Azoka. Hiru egunez, zaleek jarduera anitzez gozatzeko eta izen handiko egileak ezagutzeko aukera izan dute. Merkatari gunean 60 saltoki egon dira eta salmenta onak izan dira, Getxoko Kultur Etxeak adierazi duenez. Aurtengo azokan nabarmentzekoa da Eddi Campbell eta Miguelanxo Pradoren parte-hartzea, egile ospetsu horiek beren azken lanak aurkeztu baitituzte: "Mi libro sobre el dinero" eta "Ardalén", hurrenez hurren. Komikigile horiez gain, iazko Komiki Sari Nazionalaren irabazlea, Santiago Valenzuela, eta aurtengoa, Alfonso Zapico egon dira. Azken horrek "Dublinés" lanaz baliatuta eskuratu du saria. Max, Albert Monteys, Teresa Valero, Marika, Hernán Migoya, Javier de Isusi, Mauro Entrialgo, Larri, Ata eta Abarrots egileek ere parte hartu dute azokan. Argazkian, Getxoko Komiki Azoka jendez lepo aurreko edizio batean / © Getxoko Kultur Etxea.
Gonbidatutako egileen sinatze-txandez gain, beste jarduera asko ere egon dira azokan, esaterako hitzaldiak, nobedade aurkezpenak, animazio filmen proiekzioak, haurrentzako tailerrak eta erakusketak. Azken horiei dagokienez, Miguelanxo Pradoren "Ardalén" eleberri grafikoaren ingurukoa nabarmendu behar da. Halaber, "Hazañas bélicas de ayer y hoy" erakusketak 40ko eta 50eko hamarkadetan hain arrakastatsua izan zen eta duela gutxi Glénat argitaletxeak proiektu editorial berri batekin berreskuratu duen komiki sail mitikoa hurbildu zien bisitariei. TMEO umore grafikoko aldizkari gasteiztar ezagunaren 25 urteko ibilbideari eskainitako erakusketa ikusi ahal izan zen, baita azokaren aurtengo kartelaren egilea izan den Santiago Valenzuelaren erakusketa ere. Ohi bezala, Azokak urtero komikiaren arloko eragileei eskaintzen dien omenaldia ez zen falta. Aurtengo protagonistak Europako komiki argitaletxe garrantzitsuenetakoa den Norma Editorial eta Ondarroako Komiki Jardunaldiak bezalako ekimenen bitartez bineta mundua sustatzen urteak daramatzan Luterl Taldea izan dira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun