"Ez jolastu nire lan-ordu eta soldatarekin. Osakidetza publiko eta gardena” lelopean, gaur Gasteizko Santiago ospitalean buruturiko mobilizazioa abian izango diren ekimen ezberdinetariko lehena izan da. Horien helburua zera da: "EAJren Gobernuari zein Osakidetzako zuzendaritzari exijitzea abenduko zein ekaineko ordainsaria ordain ditzaten eta lan-ordu kopurua ez igotzeko 37,5 ordura astean", LABek adierazi duenez. Horretarako, kanpaina horren barruan zentroz zentroko mobilizazioak burutuko dira, erabiltzaileei informazioa helaraziz, sinadurak jaso eta abenduaren 20an zentroetan tinkotasunez erantzuteko eta mobilizatzeko eguna antolatu. Dena lan-baldintza duinak eta gure osasun sistema publikoa defendatze aldera. Uribe Kosta eta Erandion hamaika osasun etxe dauzka Osakidetzak: hurrenez hurren, Alango (Algorta), Bidezabal (Algorta), Astrabudua, Berango, Altzaga, Gorliz, Areeta, Leioa, Plentzia, Sopela eta Urdulizen. Horretaz gain, Andraka (Lemoiz), Armintza, Barrika, Erandio Landa, Lemoizen dago kontsultategi bana; Gorlizen ospitalea; eta, Algortan, Uribe osasun mentaleko zentroa. Argazkian, 2011ko urtarrilaren 24an, Bizkaiko Etengabeko Atentzio Guneetako (EAG) 60 bat langile egin zuten elkarretaratzea Algortako Alango kaleko anbulatorio aurrean, egunotan deituak zituzten lanuzteen barruan.
LABen iritziz, "arazoa ez da juridikoa, politikoa baizik". Hau da, "ea benetan Madriletik inposatzen dizkiguten neurrien aurrean men egiten den edo intsumiso bihurtu". Horregatik EAJren gobernuari exijitu diote "euskaldunon eskaerei kasu egiteko eta betetzeko, eta balizko legalitatea bete-behar horren aitzakiapean osasun publikoa pribatizatzeko eta ahultzeko bere betiko bideari uzteko behingoz". Sindikatu abertzalearen ustez, "neurri biak oso larriak" dira eta "urte luzetako borroketan lortutako eskubideak zaplazteko batez desagerrarazi" nahi dituzte aipatu neurriok. Ezartzen badira ondorioak larriak izango dira eta soilik kolpatuko dute gehiago gure ekonomia. Lan-jardunaren lupenak 3.000 behin-behineko kontratu desagertzea eta lan-baldintzak are gehiago okertzea baino ez du ekarriko; gure soldata banatzen den 14 pagetako bat kentzea soldataren %8 kentzea da, eta honi gehitu behar orain 2 urte kendutako %5 eta 3 urtez soldatak izoztea. Azken finean, lan-baldintzetan atzera pausu ikaragarri honek arreta asistentziaren kalitate-galera eta euskal osasun sistema publikoa ahultzea dakar", azaldu dute langile erakundetik.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun