Joan den ostegunean ospatu zen Leioako Eguna Artatza jauregian. Hori baliatuz, "udalerrian nabarmen lan egin" duten erakunde edo pertsonei omenaldi publikoa eskaini nahi izan zien Leioako Udalak. Aurten sariduna Andrak emakumeen elkarte sozio-kulturala izan da, udalerriko emakumezkoekiko erakusten duten arduragatik. Andrak elkartea orain dela 22 urte jaio zen Leioako Emakumeen Sustatze Zentroan, nagusien prestakuntza akademikotik harago zihoan kezka bati erantzuna eman nahian. Hori dela eta, helburu zehatz batzuekin sortutako taldea eratu zen: emakumea gizarte eta kultura eremura sartzen laguntzea eta sustatzea; emakumeek beren interesen araberako eskaintza erakargarri bat izateko bideak bilatzea; nagusien hezkuntza iraunkorra errealitate izaten lortzea; eta emakumeen parte-hartze eta giza integrazioa eremu honetan handitzea, eremu beraren ongizatean eragin positiboa izan dezan. Argazkian, Andrak elkarteko kideak saria eskuan / © Leioako Udala.
Andrak elkarteak, bere sorreratik, 1990etik hona, Leioako emakumeen ezinegon eta sentsibilitate anitz bildu ditu. Horrela, gaur egun bi mila bazkide baino gehiago dira eta bere ekintzetan 500 erabiltzaile baino gehiago aritzen dira. Era guztietako eta ugariak diren ekintzak antolatzen ditu: tailerrak eta ikastaroak, hitzaldiak, batzarrak edo gizarte ekintzetan parte hartzea, bisitaldi kulturalak, antolatutako bidaiak etab. Beti emakumea eta bere beharrak, arazoak eta ezinegonak oinarri ditu eta horiek sortzen diren eremuan lan egin nahian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun