Aitzitik, guk ez dakigu zer egin, ez dakigu nola jokatu. Salaketa ipiniz gero, beraiek salatzailearen kontrako salaketa jarriko dute, eta termino judizialetan euren hitzek gureen pisu bikoitza daukate. Buru-gogor jarri eta gaztetxea miatzeko agindu bat behar dutela errepikatzea, euren porren laztan goxoak jasotzeko dei bat egitearen pareko ekintza da. Ez dakigu noren babespean egin ditzaketen horrelako barrabaskeriak, hona etorri eta inolako azalpenik eman gabe eta zigorgabetasun osoz kaleko begiradetatik at gelditzen diren umiliazioak gauzatzeko indarra nondik ateratzen duten. Umiliatu egiten gaituzte, eta 24 urtez Gasteizko gazteekin egindako lana eta jartzen ditugun gogoak ezdeusean uzten dituzte ekintza hauen bidez.
Hala eta guztiz ere, aurrera ateratzen dugun proiektu honetan sinismen osoa daukagu, eta honelako indar erakustaldiekin, ez gaituzte kikiltzen. Are gehiago, gogo berriz jaikiarazten gaituzte hurrengo goizetan, egiten duguna norabide onean dagoela baino ez digute argi uzten.
Beste behin argi eta garbi gaztetxean poliziarik ez dugula nahi esan beharrean gaude. Beraien erabakien erantzukizuna ezin da ezerezean geratu, bada garaia zigorgabetasun polizialari aurre egiteko.
Gasteizko Gaztetxeko Gazte Asanblada
Tamalez beste behin ere Ertzaintzaren bisita izan genuen ostegun gauean Gasteizko Gaztetxean. Goizeko bostak zirela eta Gaztetxea garbitzen hasi ginela zazpi patruila agertu eta atea ostiko batez ireki zuten. Gaztetxearen inguruan istiluren bat egon izana, norbaitek kalean ustezko irain bat bota izana... berdin da, aitzakia nahikoa da etxe honetan sartzeko. Barnean zeuden lagun guztiak paretaren kontra jarri zituzten, euren poltsikoak miatu eta nortasun agiriak eskatu zizkieten. Gero, ustezko testigu batek seinalatuta arduradun bat izendatu eta gaztetxea goitik behera hankaz gora jartzeari ekin zioten. Nola ez, beste behin ere, horman zeuden preso politikoen argazkiak eta euren iritziz "susmagarriak" ziren hainbat gauza (zapiak, pegatinak, kartelak...) eraman zituzten. Gaur etxea txukuntzen ari ginela, agerian gelditu dira atzoko agenteen umekeriak: garagardo katxiak ohe gainean botatzea, bateria bat ostikoz apurtzea, eszenatokiaren izkina altxatzea (beharbada Ali-Babaren altxorra aurkituko zutela uste zuten) eta abar luze bat. Argazkian, iaz ere gaztetxean egindako Polizia operazio bat salatu behar izan zuten gaztetxeko kideak, larruetan utzitako borra markak agerian utziz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun