Adin eta gustu askotarako ekimenak prestatu dituzte Udalak eta Euskara Zerbitzuak, "euskarak ere adin eta eremu guztietara hedatu behar delako; euskara Sopela osoaren altxorra delako!", adierazi dutenez. Sopelako Euskararen Astea, beraz, azaroaren 28an hasiko da, eta lehen jarduera ez da ahuntzaren gauerdiko eztula izango. Kurtzio Kultur Etxean "Uribe Kosta lehen, orain eta gero" mahai-ingurua izango da, 19:30etik aurrera, eta Fredi Paya bertsolari ezaguna izango da dinamizatzailea. Bertan, Gotzon Elortza zenaren dokumentala izango da ikusgai, eta horren inguruko gogoeta egin ahal izango dute bertaratzen direnek: nolakoa zen Uribe Kosta lehen, nolakoa da egungo eskualdea, zer nolako Uribe Kosta gura dugun... Hurrengo egunean, luxuzko beste hizlari bat izango da Sopelan: Gotzon Barandiaran idazleak "Katamalo" poema liburuari buruzko solasalditxoa eskainiko du Kurtzio Kultur Etxean, 19:00etan. Azaroaren 30ean, euskara aretoetatik atera eta plazara eramango dute: 20:00etatik aurrera eta frontoitik hasita, bertso-poteo musikatua izango da Onintza Enbeita eta Fredi Payaren eskutik. Gainera, bertsolari biek Oxabi erromeria taldea izango dute lagun tabernaz taberna joateko. Argazkian, ekainean zendutako Gotzon Elortza errealizadore algortarraren dokumentala proiektatuko dute etzi / © Getxoko Udala.
Abenduaren lehen egunean, berriz, izen handiko antzezlana izango da ikusgai Kurtzion, 20:30etik aurrera: "Bodologuak". Euskaldun izatearen burukominak, elizaren mundu zoragarria, gure elkarte gastronomikoak, euskaldunon oporrak, etxeko animalien arropak, euskaldunok eta teknologia… eta beste gai batzuk jorratuko dituzte, hori bai, beti umorea oinarri bezala hartuz. Hurrengo egunean, abenduaren 2an hain zuzen ere, beste antzezlan batekin gozatzeko aukera egongo da, toki berean, 18:00etatik aurrera: La Baldufa taldearen eskutik, "Cirque Dejavu" antzezlana. Bertan, Fausto eta Anselmo agure, pailazo eta lagunen komeriak kontatuko dituzte. Azkenik, Euskararen Egunean ekimen bi izango dira. 17:00etan eguzki-loreen paparrekoak eta lauburu lepokoak egiten irakatsiko Kurtzio Kultur Etxean. Eta eguna guztiz biribiltzeko, "Nortasunaren bila" antzezlana eskainiko dute Kurtzion, 19:30ean. Herriaren sustraiak ezagutzeko gogoa ematen duen antzezlana da. Izan ere, mitologiak eta errealitateak bat egiten dute ikuskizun honetan, betiko kantuak abestu bitartean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun