"Ez dute inkestarik nahi, ez dute herri-kontsultarik nahi, eta noski, ez dute auzokideen parte-hartzerik nahi. Desinformatua dagoen herria nahi dute, isilarazia, protesta edo kritikarik egiten ez duen herria", salatu du Berangoko Bilduk. Hala ere, jelkideek "esfortzuak antzuak" direla ohartarazi dute koaliziokoek: "Auzokideak isilarazten saiatzen diren arren, Udal garden eta parte-hartzaile baten alde lanean jarraituko dugu, auzokideei ahotsa emanez".
Beraz, "orain inoiz baino gehiago", auzokideak animatu dituzte inkestak betetzera, eta honako helbideetan uztera:
- Berangoko 3. Posta Kodea (Sabino Arana kaleko Correos-eko egoitzan edo zuzenean bertako postontzian).
- Udaletxeko postontzia.
- Sei Herri herriko taberna, asteburuetan.
- E-posta helbidea: berango[abildua]bildu.info
- Eskura emanez zuzenean Bilduko kideei.
Azken egunetan Berangoko Bilduk herriko etxebizitza guztietan inkestak banatu ditu auzokideen iritzia zein den ezagutzeko asmoz. Horrela, koalizio independentistak zuzen-zuzenean ezagutu nahi du zeintzuk diren berangoztarren beharrizanak, 2013rako aurrekontuei begira bere proposamena osatzeko. Galdetegiak jasotzeko, Bilduko kideek hainbat postontzi jarri zituzten joan den astelehenean, herriko kultur etxe bietan. Bertan, berangoztarrek inkestak sartzeko aukera zuten. Baina, astelehen horretan bertan, "EAJk postontzi horiek kentzea agindu zuen, auzokideei euren iritzia ematea ukatuz", ezkertiarrek salatu dutenez. "Erabaki honen aurrean, lotsa eta amorrua sentitzen dugu. Izan ere, PNVren jauntxokeriaren beste adibide bat baino ez da. Gainera, PNVren Gobernu Taldeak egin beharko lituzke aurrekontu parte-hartzaileak, ardura hori oposizioak hartu beharrean. Baina parte-hartzea sustatu beharrean, parte-hartzea sustatzen dugunoi trabak jartzen dizkigute", adierazi dute Bildukoek. Argazkian, Anabel Landa Berangoko alkate jelkidea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun