Carles Castellanos i Llorenç Assemblea Nacional Catalana edo Biltzar Nazional Katalanaren presidenteordea bihar, asteartea, mintzatuko da Algortan, "Katalanen Biltzar Nazionala... eta gurea?" izeneko mahai-inguruan. Hitzordua Villamonte kaleko kultur etxean, arratsaldeko 7etan, jarri du Ikasketa Bolibartarrak elkarteak, mahaian Tomas Urzainki Mina Nabarraldeko kidea eta Itxaso Paya aurkezlea ere izango direla. Carles Castellanos Bartzelonako Unibertsitate Autonomoko irakaslea, idazlea eta itzultzailea izateaz gain, militante independentista ezaguna da. 1960an, 18 urterekin, Front Nacional de Catalunya-n sartu zen. Handik aurrera, mugimendu independentistako hainbat erakundetan parte hartu du, hala nola, PSAN, PSAN-Provisional, IPC, eta abar. Moviment de Defensa de la Terra-ko buruzagietako bat bilakatu da eta hizkuntz eta kulturgintzan eskarmentua dauka. Iazko apirilean burutu zen Estatu propioaren aldeko Nazio Konferentzian Kontseilu Iraunkorreko kide hautatu zuten. Urtebeteko lanaren ostean, pasa den martxoan, 1.500 lagunek Biltzar Nazional Katalana erakunde zibila eta alderdietatik independentea abiatu eta horrek milioi bat lagun batu zuen pasa den irailaren 11ko Diadarako deia egin zuten. Argazkian, Diadako irudi bat / cc-by-nc Gemma Cascón - Assemblea.cat.
Antolatzaileen ustez, Castellanos eta Urzainkiren arteko solasaldia "ekitaldi inportantea izango da nafar estatua berriro ere libre ikusi nahi dutenentzat, baita subiranotasunaren abantailak zein diren entzun nahi dutenentzat ere". Era berean, zabaldu dutenez, galdera zehatz bati erantzun nahi dio biharko hitzorduak: "Espainiako ustelkeria, faltsutze historikoa eta porrota albo batera uzteko tenorea iritsi ote zaio Nafarroari? Hori da koska eta eztabaida".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun