Tere Egurrola 65 urteko emakumea eta 68 urteko bere senarra hilik aurkitu dituzte gaur Arabako Asparrena udalerriko Araia auzoko beren etxean. Herrizaingo Sailak zabaldu duenez, goizeko 9:30ean bizilagun batek aurkitu du gizonaren gorpua zintzilik, eta poliziak etxera sartu direnean emakumearena ere topatu dute, bi gorpuek indarkeria zantzuak dituztela. Albiste agentzien arabera, andrea ohean zegoen, kolpe bat zuela buruan, ustez aizkorakada batek eraginda. Ertzaintzak oraindik gertaera ikertzen dabil, baina Idoia Mendia Eusko Jaurlaritzako Herrizaingo sailburuak baieztatu duen lehen hipotesiaren arabera, senarrak emakumea hil du, eta bere buruaz beste egin du ondoren, habe batetik urkatuz. Herrizaingo Sailak jakinarazi du emakumeak ez zuela salaketarik jarrita bikotekidearen aurka. Dagoeneko, gaitzespen ekitaldiak antolatu dituzte erakundeek. Gauzak horrela, Asparrenako Udalak elkarretaratzea deitu du gaur 18:15erako Araiako Herriko Enparantzan. Tere Egurrola aurten Euskal Herrian genero indarkeriagatik eraildako zazpigarren emakumea izanda, eskualdeko mugimendu feministak "erantzun irmoa" ematera deitu du. Besteak beste, bihar, asteazkena, 19:30ean kontzentrazioa antolatu du herriko bulebarrean Leioako Bilgune Feministak. Argazkian, Leioan izandako protesta feminista bat, artxiboko irudian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun