Tere Egurrola aurten Euskal Herrian genero indarkeriagatik eraildako zazpigarren emakumea izanda, eskualdeko mugimendu feministak "erantzun irmoa" ematera deitu du. Besteak beste, gaur, asteazkena, 19:30ean kontzentrazioa antolatu du herriko bulebarrean Leioako Bilgune Feministak. Algortako Bilgune Feministak, berriz, bihar egingo du kontzentrazioa, 19:00etan, Telletxe plazan. Tere Egurrola 65 urteko emakumea eta 68 urteko bere senarra hilik aurkitu zituzten atzo Arabako Asparrena udalerriko Araia auzoko beren etxean. Herrizaingo Sailak zabaldu zuenez, goizeko 9:30ean bizilagun batek aurkitu zuen gizonaren gorpua zintzilik, eta poliziak etxera sartu zirenean emakumearena ere topatu zuten, bi gorpuek indarkeria zantzuak zituztela. Albiste agentzien arabera, andrea ohean zegoen, kolpe bat zuela buruan, ustez aizkorakada batek eraginda. Ertzaintzak oraindik gertaera ikertzen dabil, baina Idoia Mendia Eusko Jaurlaritzako Herrizaingo sailburuak baieztatu zuen lehen hipotesiaren arabera, senarrak emakumea hil zuen, eta bere buruaz beste egin zuen ondoren, habe batetik urkatuz. Argazkian, Algortan izandako protesta feminista bat, artxiboko irudian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun