Bestalde, BertsoTrikiBand musika ikuskizuna larunbat honetan, abenduak 1, 19:30ean izango da Andres Isasi Musika Eskolan, Areetan. Horretan, Eskolako Banda, Itxaso eta Xabi Paya bertsolariak eta Ruben Isasi trikitilaria arituko dira, lehenengo aldiz udalerrian eskainiko duten emanaldian. Eskolako Bandaren zuzendaria ere baden Alfontso Vilaren gidaritzapean jardungo dute. Berak prentsaurrekoan azaldu zuenez, oso desberdina eta berezia izango da beraientzat, “bertsolarirekin joko duten lehenengo aldia izango baita". "Folklorea guztiz sartuta egongo da emanaldian eta musikatik euskarara egin dezaketen ekarpena izango da”, amaitu zuen Vilak.
Berbodromoa
Egizu Getxo Euskaldun! elkartearen eskutik, abenduak 3, Euskararen Nazioarteko Egunean, Berbodromoaren bigarren edizioa izango da Fadurako jatetxe zaharrean. “Helburu nagusiak euskara kalera ateratzea, erabilera indartzea eta euskararen indar erakustaldia egitea dira eta horretarako jende euskalduna berbetan jarri nahi dugu, lau pertsonentzako taldetan banatuta. Aurtengo erronka 400 bat lagun biltzea izango da”, adierazi zuen Eleder Butron elkarteko dinamizatzaileak. Gaiak honako hauek izango dira: haurtzaroko gogorapenak, kontsumismoa eta teknologia berriak eta horiek sortzen dituzten harreman sozial berriak. Lau txanda izango dira: 09:00etan, 11:00etan, 17:00etan eta 19:00etan eta aurtengo berritasuna olgetodromoa izango da, euskaraz okerrago moldatzen direnentzat.
Euskal Kultuaren XIV. Jardunaldien bigarren zatia aurkeztu zuen atzo goizean Getxoko Udalak, Algortako San Nikolas ikastolan. Izan ere, horixe da aurten Argia Ereiten Euskara Saria jasoko duena, aste batzuk barru bere 50. urteurrena izango delako. Josu Elortegi San Nikolas ikastolako zuzendariak eskerrak eman zituen: “beste berrogeita hamar urtetan aurrera segitzeko eta bizkortzeko balio izango du, guk gure proiektuarekin aurrera segituko baitugu ikastolan eta kanpoan ere, gurea gizarte ekimena delako”, nabarmendu zuenez. Sari emate ekitaldia gaur, azaroak 28, izango da Fadura kiroldegian, 20:00etan hasita. Euskal Kulturaren Jardunaldiei dagokienez, hilabete osoan zehar ekitaldi ugari izango dira, tartean, BertsoTrikiBand, Berbodromoa, bertsolariak, erakusketak edo jadanik oso finkatuta dagoen GetxOnegin Lehiaketa. Pintxoen lehiaketaren laugarren edizioa izango da aurtengoa, abenduaren 15ean eta 16an, eta oraingoan udalerri osoko 44 establezimenduk parte hartuko dute. Argazkian, atzoko aurkezpena San Nikolas ikastolak / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun