Abenduaren 3ko Euskararen Nazioarteko Eguna antolatzeko ekitaldiak antolatu dituzte Erandioko Udalak eta tokiko eragile ugarik. Horrenbestez, ostiral honetan, azaroak 30, Erandio Landan izango dira jarduerak: 18:00etan, txistulariak eta umeentzako herri kirolak izango dira; 18:30ean, talo tailerra; 19:30ean, dantzak eta bertso-papera; 20:30ean, bertso-triki-jira; eta azkenik, 21:30ean, bertso afaria Dandaka jatetxean, Ibon Ajuria eta Iñigo Mantzizidor "Mantxi" bertsolarien partaidetzarekin. Aipatu tabernan bertan, Goikolanda ikastetxean edo berbots[abildua]gmail.com helbide elektronikoaren bitartez izena eman daiteke afarirako. Larunbatean, berriz, Astrabuduan izango dira ospakizunak: 12:00etatik aurrera, trikiak, txistulariak eta kilikiak izango dira kaleetan barrera; 13:30ean, pintxopotea Josu Murueta plazan, umeentzako tailerrak, bertsopapera eta dantza modernoa. Amaitzeko, 18:00etan hasita, Matxinada taldeak girotuko du erromeria. Altzagari dagokionez, larunbatean hasiko dira Euskara Egunerako berotzen, kanta-bermutaren bitartez, 13:00etan La Plaza tabernatik abiatuta. Argazkian, lagun ugari Berbots Erandion Euskaraz! taldeak antolatutako bertsojira batean, artxiboko irudian.
Astelehenean, abenduak 3, Euskararen Nazioarteko Egunean, Altzagako azoka zaharrean izango dira ospakizunak. Goizean, 10:30etik 11:30era, berbodromoa izango da bertan, txokolate beroak lagunduta. Arratsaldean, berriz, 18:00etan, kalejira egingo dute Trikitxiki taldearekin; 19:00etan, bertsopapera; eta 19:15ean, erromeria Zesuma taldearekin.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun