Larunbat eta igandean Getxoko Manga Azokak hartuko du Komiki Azokaren lekukoa eta bertan ekialdeko komikiaren inguruko hainbat jardueraz gozatzeko aukera izango da. Areetako Xake plazako karpan hitzaldiak, erakusketak, tailerrak, lehiaketak, arte martzialen erakustaldiak eta proiekzioak izango dira. Horrezaz gain, merkatal gunea osatzen duten 30 postuetan manga nobedadeak, anime (Japoniako animazio zinea) eta merchandising objektuak erosi ahal izango dituzte bisitariek. Tarasu eta Motsukora euskal manga elkarteek antolatuta (lehen Getxoko Kultur Etxeak antolatzen zuen), azokaren egitarauak parte-hartzea du ardatz nagusia. Horrela, bada, bisitariek honako jarduera hauetan parte hartzeko aukera izango dute: tokiko eta Espainia mailako cosplay (mozorroak) eta karaoke lehiaketetan eta bideojokoen, eta Yugi Oh delako karta joko txapelketetan, besteak beste. Ordutegia 11:00etatik 14:30era eta 17:00etatik 21:00etara izango da, eta sarrerak 1,50 eurotan izango dira. Argazkian, hainbat lagun mozorrotuta Getxoko Komiki Azokako aurreko edizio batean / © Getxoko Kultur Etxea.
Tailerrak ez dira faltako azokan eta horietan idazkera japoniarra, tradiziozko koadernaketa, Origami (papiroflexia japoniarra), Anbu tradiziozko mozorroak, irudien margotzea eta Amigurumia (kakorratz-lan teknika) ikasi eta egin ahal izango dute. Halaber, manga eta komiki eta bideojokoen arte kontzeptual, koloreztatze digitala eta software profesionala eta alternatiboari buruzko maisu-klaseak egongo dira. Arte martzialen gunean, berriz, Karatea, Aikidoa eta Capoeira erakustaldiak egingo dira baita Shiatsurenak (japoniar jatorrizko masaje teknika) ere. Azokaren eskaintza honako jarduera hauez borobiltzen da: "Saint Seiya" animazio telesailaren, Lolita modaren eta mangaren inguruko erakusketak; proiekzioak; hitzaldiak; mahai-inguruak; Mugan taldearen saioa eta estatu mailan oso ezagunak diren Kukuruyo eta Nacho Fernández egileen parte-hartzea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun