Ostiral honetan, azaroak 30, udal agintariek eta aurten 15 urte beteko duen Perualde GKEko kideek Getxo udalerriko gabon argiak biztuko dituzte, ekitaldi ofizialean. Hitzordua 18:15ean izango da, Itzubaltzeta / Romoko Ibaiondo kalean. Argiak 2013ko urtarrilaren 6ra arte egongo dira biztuta, igandetik ostegunera, 18:00etatik 22:30ak arte; eta ostiraletan, larunbatetan eta jaiegun bezperatan 18:00etatik gauerdira arte. Hirugarren urtez jarraian, Getxoko Udalak beregain hartuko ditu instalazio eta mantentze gastu guztiak, (100.000 euro alegia, iazko kopuru berbera). Aurten, argiztapenak "GetxOn!" kanpainaren "On!" marka edukiko du. 2011n jarri zen kanpaina hori martxan udalerrian, Merkataritza Mahaiak bultzatuta, udalerriko merkataritza eta ostalaritza establezimenduak batu eta getxoztarren eta bisitarien aurrean identifikatzeko irudi komuna sortze aldera. Imanol Landa alkateak adierazi duenez, “bizi dugun krisialdi larriaren aurrean gure laguntza ematen diogu berriro tokiko merkataritzari. Gainera, argiztapenaren aurtengo gaiak GetxoOn marka indartu egingo du, herriko merkataritzaren eta ostalaritzaren ordezkari bezala, Gabonetan udalerriaren dinamizazio ekonomikoa laguntze aldera “. Argazkian, iazko abenduaren 5ean, Gabonetako argiak pizteko ekitaldi ofiziala egin zuten Algortan Imanol Landa alkateak, Maite Ibarbengoechea Getxo Enpresako presidenteak eta Merkataritza Mahaiko kideek / © Getxoko Udala.
Merkataritzako guneetan On! apaindurez gain eta aurrekoetan bezala, Udala leku publikoetan honako hauek ipintzen ari da: kontsumo txikiko 4.900 metro luzeko argi-hari mikro bonbilla edota LED (80,6 Kw.) argitxoekin eta beste 47 mikro bonbilladun apaingarri (12,8 Kw). Apaingarriak, Eduardo Coste kalea, Santa Ana plaza, Bizkaiko Zubiko plaza, Areetako Etorbidea, Xake plaza, Ganeta plaza, Artatza biribilgunea, Asuako errepidea, Arriluze, Zugatzarte, Basagoiti, Amezti, Euskal Herria kalea, Manuel Gainza parkea, Bidezabal, Ormaza biribilgunea, Oiarretxe, Maidagan, Andra Mari kiroldegia, Villaondoeta eta Salsidu kaleetako hainbat lekutan jartzen ari dira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun