Iaz ere eskaini zuen aipatutako zerbitzu berezia Kukupraka ludotekak, hiru opor garaietan, guztira 63 egunetan, eta horietan 1.230 aldiz erabili zuten.
Ludotekak gainontzeko egunotan bere ohiko programa adinaren araberako hiru txandetan eskaintzen du. 2012-2013ko ikasturtean 95 bazkide daude eta 2007-2008an zabaldu zenetik, guztira, 521 bazkide izan ditu.
Urteko azken hiruhilabetekoari amaiera emateko, ludotekak abenduak 21, 17:30etik aurrera, jai bat egingo du, hilabeteen azken ostiraletan bezala, 5 eta 9 urte bitarteko haurrei zuzenduta. Jaian, besteak beste puzgarriez, musikaz, zozketaz eta abarrez gozatu ahal izango dute.
Datozen Gabonetan, opor garai guztietan bezala, Areetako Eskoletako plazan dagoen Kukupraka ludotekak zerbitzu berezia eskainiko du bazkide zein bazkide ez direnentzat. Ez da aldez aurretik izena eman beharko, ezta ordaindu beharko ere. Pertsona interesatuek umeak eraman eta datu batzuk eman beharko dituzte. Getxoko Udalak antolatuta, zerbitzu hori abenduaren 26, 27 eta 28an eta urtarrilaren 2, 3 eta 4an izango da, 5 eta 11 urte bitarteko umeei zuzenduta. Ordutegia 10:30etik 13:30era bitartekoa izango da. Pasa den asteartean burututako Getxoko Udalbatzan, PPko Marisa Arrue zinegotziak Areetan eta Algortan Gabonetan doako haurtzaindegiak jartzea eskatu zuen, bertako dendetan erosketak egingo dutenei zerbitzua egiteko. Orduan ezagutarazi zuen Itziar Epalza Udal Gobernuko kideak Kukuprakak Gabonetan eskainiko duen zerbitzu berria. PPren mozioa onartu zen, BIlduren babesari esker, baina EAJk jakinarazi zuen ez zuela aurrera eramango lau arrazoiengatik: Udalbatzaren eskuduntza ez izatea, Areetan toki gisa proposatutako Getxo Elkartegia aproposa ez izatea, Kukuprakak eskatutakoa ordezkatuko duelako eta prestaketak egiteko denbora ezagatik. Argazkian, Kukuprakako umeak judo saio batean / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun