Metro Bilbaok eta Ahize-AEK hizkuntz aholkularitzak lankidetza-hitzarmena sinatu dute gaur, Euskararen Nazioarteko Eguna. Akordioaren xede nagusia da garraio enpresak hizkuntzak kudeatzeko sistema ezar dezan. Horrekin batera, kanpoko zein barruko harremanetan, euskararen erabilera areagotu eta dinamizatzeko plana diseinatu eta martxan jarri nahi dute. Metro Bilbaok eta AEKk urtebeteko epea hitzartu dute horretarako. Tarte horretan hizkuntza-diagnostikoa zehaztu eta hobekuntza-plana bultzatuko dira, Bikain euskara-kalitatearen oinarrizko ziurtagiriaren mailara heltzeko. Bitartean, euskara sustatzeko baliabide berriak eskainiko dizkiete langileei. Horren harira, plana "Metro Bilbaoren gizartearekiko erantzukizunarekin loturiko konpromisoetan txertatzen" dela zabaldu eta "langileen arteko zein bezeroenganako harremanetan, elebitasunean eta hizkuntzaren normalizazioan legeak eskatzen diona eta gehiago egin izan duela beti" aldarrikatu du Metro Bilbaok. Argazkian, Mertxe Mujika Balantzategi AEKko koordinatzaile nagusia eta Iñaki Etxenagusia Metro Bilbaoko zuzendari nagusia gaur sinatze ekitaldian / © Metro Bilbao.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun