Barrikako EAJko presidente ohiaren kontrako delitu ekologiko akusazioa artxibatu egin dute
Bilboko Zigor arloko bigarren epaitegiak ostegunean artxibatu egin zuen Barrikako EAJko presidentea zen Jon Larrazabal eraikitzailearen eta Alexander Albizu enpresariaren kontrako auzia, "El Correo Español" egunkariak adierazi duenez. Barrikabasotik gertu, orain urteak egindako isurketak direla eta, delitu ekologikoa leporatzen zien biei Txipio Bai talde ekologistak. Excavaciones Baranda SA, lurrak mugitu zituen enpresaren arduraduna da bigarren inputatua, 2009ko ekainean kasua artxibatzeko eskatu zuena. Aipatu iturrien arabera, ordea, artseniko eta kadmio mailak ohikoak baino altuagoak baieztatu arren, osasunerako kaltegarriak ez direla baieztatu du Sepronak egindako txosten toxikologikoak. Eta horri jarraiki, salaketa bertan behera utzi du akusazioak. Bizkaiko Lurralde Auzitegiko Fiskaltzak bi urteko espetxe zigorra eskatzen zuen akusatu bakoitzarentzat; baita 5.400 euroko isuna eta bi urteko inhabilitazioa (euren ogibidean) ere. Txipio Baik, berriz, bost urteko espetxe zigorra, 20.000 euroko isuna, lau urteko inhabilitazioa eta kutsatutako lurrak garbitzea. Argazkian, "mahastiak landatu ahal izateko" lur eremua "egokitzeko" lizentzia eskatu zion Barrikako Udalari Larrazabalek.
Txipio Baik bere garaian azaldutakoaren arabera, 2002ko bukaeran, "mahastiak landatu ahal izateko", 8.000 metro koadro baino gehiagoko lur eremua "egokitzeko" lizentzia eskatu zion Barrikako Udalari Larrazabalek. "Bi urte geroago eskaera aldatu zuen horrek, 70.000 metro kubiko lur botatzeko bertan. Gainera, lortutako lizentzia Excavaciones Baranda SA enpresari ematea eskatu zuen", aipatu zuen salaketan elkarte naturalistak. Ekologisten arabera, Barrika, Barrikabaso, Artepeta eta hondeaketa lanak egiten zebiltzan beste eremuetatik ateratako hondakinak ziren horiek. Aipatu guneetako obren "kontratista zen Jon Larrazabal", Txipio Baik salatu zuenez. Baita "lur horiek kutsatuta egon zitezkeela" ere. Ildo horretatik, "proiektua bi azaletan banakatzea" egotzi zion Larrazabali epaileak, "Eusko Jaurlaritzako Ingurumen Sailean baimena eskatu beharra saihestu eta Udalan bakarrik eskatu behar izateko".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun