Gizon bat atxilotu dute Gorlizen 600.000 euroko nazioarte mailako banku-iruzurra egitea egotzita
Ertzaintzak A.R.H. gizonezkoa atxilotu zuen joan den ostegunean Gorlizen, iruzur egin, agiri pribatua faltsutu eta egoera zibila usurpatzea egotzita. Eusko Jaurlaritzaren Herrizaingo Sailaren arabera, aipatu laguna bankuei 600.000 euroko iruzurra egin die Espainia eta nazioarte mailan. Ertzaintzak joan den irailean ekin zien lehen ikerketei. Orduan aurkeztu zuen salaketa herritar batek Sestaoko komisarian, hilabete batzuk lehenago ustez milaka euroko maula egin ziotelako Internet bidez. Hasierako ikerketa ildoei esker jakin zuten gaia iruzur masibo bat izan zitekeela, eta horregatik lantalde bat sortu zuten, Sestaoko ertzain-etxeko ikerketa agenteak gidatutakoa, Delitu Ekonomikoen Unitatearekin lankidetzan. Herrizaingo Sailaren iturrien hitzetan, atxilotutakoak izen ugari erabiltzen zituen, eta enpresa faltsu bateko paymaster gisa (bitartekari nagusia) jokatzen zuen: inbertsio egile handietako bezero eta bitartekariei banku bermeak (banku batek bezero bati eskainitako bermeak dira, bankuaren kredituak bezeroaren kreditua ordezkatzeko transakzio jakin bati dagokionez) alokatu edo erosteko aukera eskaintzen omen zien; horri esker irabazi nabarmenak lortuko zituztela hitz ematen zien.
Azpibitartekari haiek interesak zituzten higiezinen, eraikuntzaren eta bankuen esparruetan, eta aipatutako eragiketari esker, gainera, komisio altuak eskuratuko zituzten. Atzemandako gizonezkoa bitartekari nagusi gisa agertzen zen bere ustezko enpresak egiten zituen eragiketa guztietan, estatuan zein nazioarte mailan; bitartekariak eta inbertsio egileak konbentzitzea lortu zuen, dokumentazio faltsua igorriz eta Hong Kong eta Singapurreko banku entitateetan kontuak erabiliz. Joan diren azken asteetan ikerketak abiadura azkarragoa hartu zuen, hainbat bezerok eta bitartekarik ere salaketak aurkeztu zituztelako. Horren haritik, ikertzaileek uste dute iruzurrak kaltetutako pertsonen kopurua altuagoa ere izan daitekeela, Espainian zein nazioartean. Hori dela eta, Ertzaintzak herritarren laguntza eskatu du eta horretarako Sestaoko ikerketa taldearen telefono zenbakia eman du: 944 063 400. Ustezko autorea atzeman eta gero Ertzaintzak zenbait erregistro egin zituen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun