2009ko martxoko udal osoko bilkuran adostutakoari jarraiki, "terrorismoaren biktima guztien" oroimenezko urteko ekitaldia egin zuen joan den ostiralean, azaroak 30, Getxoko Udalak. "ETAk Getxo udalerrian egindako atentatuetan edo getxoztarrak izanik herritik kanpo hildako 19 pertsona eta GALek eraildako beste bat —Xabier Galdeano kazetari algortarrari buruz—" oroitzeko ekitaldia zela azaldu zuen Imanol Landa alkate getxoztarrak, "terrorismoaren biktima guzti-guztiak" omentzen ari zirela argumentatzeko. Besteak beste, aipatu zerrendan ez zen agertzen 1969ko Itzubaltzetako jaietan Francoren garaiko Getxoko udaltzain batek tiroz erail zuen Felix Arnaiz Maeso "Lagun" 20 urteko gazte leioaztarra. Ohikoa denez, txistulari batek "Agur Jaunak" jo zuen eta ondoren minutu bateko isilunea egin zen. Ekitaldia osotzeko, udal agintariak San Inazio plazan jarritako eskulturan bertan lore sorta bat utzi zuen. EAJ, PP eta PSE-EEren zinegotziek parte hartu zuten ekitaldian. Bildukoak ez ziren agertu. Argazkian, Landa eskulturan lore sorta uzten / © Getxoko Udala.
Bildu salbu, Getxoko Udalean ordezkaritza duten alderdi politiko guztiak elkartu ziren, "terrorismoaren biktimen omenez" jarritako eskulturaren aurrean egin zen ekitaldian. Hain zuzen ere, koalizioko kideak ez egotea izan zuten hizpide gainontzeko alderdiek. Nerea Llanos Bizkaiko PPko idazkari orokorraren hitzetan, “pena da” oraindik pausoa ematera ausartzen ez diren alderdi politikoak egotea. “Idatziz hainbat kontu esaten dituzte, baina jarrera hori ez dute behar denean erakusten”, gaineratu zuen. Ildo beretik hitz egin zuen Luis Almansa Getxoko PSE-EEren buruak. Bilduk omenaldian parte hartu ez izana azpimarratu zuen. Horren aurrean, “hitzekin baino, ekintzekin erakutsi behar dute garai berri baten aurrean gaudela”, esan zuen. “Ezker abertzalearen eta Bilduren borondate oneko hitzak ezerezean gelditu dira gaur. Gaur hemen egon behar zuten”, gaineratu zuen Almansak. Imanol Landa Getxoko alkateak (EAJ), ordea, "ezker abertzaleko hainbat kidek eragindako kaltea aitortu izana" azpimarratu zuen. Horretaz gain, orain arte biktimen inguruan lortutako akordioak "berrikusi eta horiekin bat egitera" deitu zituen Bildukoak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun