Iñaki Goirizelaia Euskal Herriko Unibertsitateko errektore berrautatu dute beste agintaldi baterako, atzo egindako hauteskundeen ondoren. Boto haztatuaren %55,31 bere hautagaitzarentzat izan da. Beraz, 2008ko abenduko hauteskundeetan lortutako babesak %3,11 igo du. Oraingoan, aurreko agintaldiaren hasieran egindako estatutuen aldaketaren ondorioz, hautagai bakarra badago, botazio bakarra egingo da. Botazio horretan, hautesleek hautagaiari emango diote botoa edo, bestela, boto zuria. Hautagai bakarra hautetsi aldarrikatuko da boto baliodunen artetik heren bat baino gehiago aldekoa bada. Atzoko hauteskunde eguna emaitzak aurkezteko prentsaurrekoarekin bukatu zen. Bertan ezin izan ziren bozketa elektronikoaren datuak eman, eta horregatik ekitaldia atzeratu zen. Lehen aldiz eskaini da errektorea aukeratzeko hauteskundeetan elektronikoki botoa emateko aukera. "Dena den, botoen %85 baino gehiago zenbatuta zegoenez, emaitzetan ezin zen aldaketa handirik egon", azaldu dute EHUko iturriek.
Bozketa elektronikoaren datuak eskuragarri egon ziren atzo 23:00etan. "Akatsa botoak zegozkion taldeari atxikitzean gertatu zen", azaldu du Jon Irazusta Hauteskunde Batzordeko presidenteak. "Horrek bigarren zenbaketa egiteak eskatu zuen. Prozesu informatikoaren zailtasunak berandutu gintuen, eta atzerapenaren azalpena teknikoa da hertsiki. Kontua da gau horretan bertan itxi zela prozesua, gure Batzordeko kide guztiek egiaztatu ahal izan genuen bezala", gaineratu du. Hauteskundeen behin betiko emaitza abenduaren 17an aldarrikatuko da, inpugnazioetarako epea behin amaitu ondoren.
Emaitzak taldeka
Unibertsitateko taldeei erreparatuta, Goirizelaiak babes zabala lortu du hirutan: irakasle doktore iraunkorren taldean (boto haztatuen %32,98, 941 boto alde, 664 zuri); gainerako irakasle eta ikertzaileen artean (%1,45, aldeko 412 boto eta 182 zuri); eta ikasleen artean (%13,14, 884 boto alde eta 601 zuri). Irakasle ez doktore iraunkorren taldean emaitzak oso berdintsuak izan dira (boto haztatuaren %3,70, 117 boto alde eta 120 zuri). Soilik administrazio eta zerbitzuetako pertsonalaren babesa txikiagoa da (boto haztatuaren %4,03, aldeko 441 boto, 880 zuri).
Parte hartze altua
Nabarmentzekoa da talde guztien parte hartze altua, ikasleenean izan ezik. Hortaz, irakasle doktore iraunkorren parte hartzea %74,10 izan da; AZPrena %71,07; irakasle iraunkor ez doktoreena %50,20 eta gainerako irakasle eta ikertzaileena, %21,84. Ikasleen parte hartzea %3,57ra jaitsi da.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.