Aitziber Idigoras Durangoko alkateak ere jendea animatu du Durangora etortzen, azoka bizirik eta prest dagoela, Durango bera bezala, eta bertara etorri eta ijitoen kultura hobeto ezagutzeko aukera izango dutela adierazi du. Josune Ariztondo Kultura foru diputatuak, ostera, Durango Azoka izena eta izana dela, eta euskal idazle sortzaileak ekarri ditu gogora, Lauaxeta besteak beste. Blanca Urgell Eusko Jaurlaritzako jarduneko Kultur sailburuak aipatu du euskal kultura sorkuntza gurean bizirik dela, krisi garai hauetan ere, eta ijitoena ere badela euskal kultura, gurearen parte dela. Bakartxo Tejeria Legebiltzarreko presidenteak ere krisia izan du aipagai, baina garai zail hauetan, auzolanean eta lan gogor eginez, aurrera aterako garela eta horren erakusle dela Durangoko Azoka oparoa.
Azkena berba egiten izan da Manuel Vizcarraga. Haren aita ekarri du gogora euskal ijitoen patriarkak eta irribarrea eragin du batutakoen artean komentarioekin. Ijitoen koloreekin egindako zapiak banatu ditu batutako agintari eta bestelakoen artean Vizacarragak.
Baina, Durangoko Azokako ekitaldiko unerik ederrena, hunkigarriena, politena, amaieran etorri da, hitzak eta musikak bat egin dutenean, gitarra flamenkoak eta bertsolarien berba soinuek bat egin dutenean. Fusio magikoa eskaini digute batutakoen gozamenerako, Arzallus eta Estiballesek bertsotan, eta Jorge Pisa El Boli-k gitarrarekin.
Egunero, 10:30etik 20:00etara
Lau egunez, 10:30etatik 20:00era bitartean izango da zabalik Azoka, Landako gunean, baina hainbat ekitaldi antolatu dira gauez ere.
253 erakusmahai, 400 nobedade pasatxo eta 300 ekitalditik gora izango dira aurten, eta horiek guztiak hartzeko, zazpi gune: Areto Nagusia, Saguganbara, Ahotsenea, Plateruena, Irudienea, K@bia eta Szenatokia. Bereziki azken hiru horiek, iaz zabaldutakoak, nabarmendu dituzte antolatzaileek, horiek indartzeko eta egonkortzeko sekulako ahalegina egin dutela esanez.
Saguganbara, bere aldetik, Haur Literatura Aretoa moduan ezagutzen zen orain arte, baina izen berritu eta egokiago batekin dator aurten, haurrentzako ez ezik gurasoentzako ere badelako eta ez delako literaturara mugatzen.
Kultura Ijitoa izango da aurtengo kultura gonbidatua. Izan ere, 600 urte inguru dira bizikide dugula euskal lurraldean –1435ean iritsi ziren hona–, baina hala ere, kultura ikusezin bezain urrunekoa da gutako hainbatentzat.
Benito Lertxundik jasotzear du aurtengo Argizaiola saria. Lerro hauek idaztean hastekoa baita ekitaldia Szenatokian, San Agustinen. Jon Maiak zuzendu eta gidatuko du ekitaldia.
Goizeko 10:30ean zabaldu ditu ateak Durangoko Liburu eta Disko Azokaren 47. edizioak, lehen lerroan EHUko hiru irakasle kaleratuetako bi pankarta zabaltzeko prest zeudela. Haien atzean, ehunaka euskaltzale eta kulturzale sartu dira Landakoko aretoan, azokak ekarritako nobedadeak ikuskatzera. Egun osoan zehar, handia izan da joan-etorria. Ofizialki berriz, bestelakoa izan da Azokaren hasiera, eguerdian egindakoa: formalagoa, agintarien diskurtsoekin, eta baita alde umoretsu eta hunkigarriagoa ere, bertsolarien eta flamenko gitarra jotzailearen fusioarekin. Izan ere, toki berezia hartu du gaurko ekitaldi nagusian, ijitoen kulturak, aurten Azokako gonbidatu bereziak, Kale Dor Kayiko elkarteak, hain justu ere. Ekitaldian, Manuel Vizarraga Kale Dor Kayiko ijitoen elkartearen elkarteko presidenteak parte hartu du, Durango, Bizkaia, Gipuzkoa eta EAEko ordezkariekin batera, tartean Miren Dobaran Bizkaiko Foru Aldundiko euskara zuzendari berangoztarra. Aurkezle lanetan aritu da Nerea Mujika Gerediako presidentea. Honek ondo etorria eman die agintariei eta bertaratu diren guztiei eta herritarrak animatu ditu Azokara etorri, ikusi, erosi eta disfrutatzera. Gainera, aipatutakoa ez da egun Durangon burutzen den azoka bakarra. Sapuetxe gaztetxearen ondoan XIII. Azoka Alternatiboa abiatu zuten atzo, eta egun berean ireki zuten artisautza azoka den Euskal Denda, antzinako merkatuan dagoena. Aurten ez du parte hartzen eskualdeko artisaurik. Argazkian, Landakoko irudi bat / © Gerediaga elkartea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun