Azaroaren 10eko Baionako manifestazioan preso eta iheslari politikoen aldeko borrokan "urrats kualitatiboa eta kuantitatiboa" izan zela nabarmendu zuen Herrirak. Indar hori Bilboko manifestazioari begira jartzea da orain xedea. Urtarrilaren 12an "lurrikara txiki bat" eragin nahi duela jakinarazi du Herrirak. "Inori kalterik egin nahi ez dion lurrikara" izan nahi du, baina "batzuen" kontzientziak astinduko dituen mugimendu sakona. Funtsean, Herrirak espero du gatazka politikoaren konponbiderako
"mugarri" izatea.
"Bakeari bizkarra emanez jarraitzea eta oinarrizko giza eskubideen ukazioan tematzea gero eta ulertezinagoa" dela dio Herrirak, eta baieztatu du "eskubide urraketa horren gaitzespena gizartean nagusi" dela. Urtarrilaren 12ko manifestazioak sostengu ugari jaso ditu dagoeneko, eta indartuz joanen da ordura arte. 17:30ean abiatuko da Casillatik, “Giza eskubideak, irtenbidea, bakea. Euskal presoak Euskal Herrira” lelopean.
Joan den asteartean, abenduak 4, euskal preso politikoen aldeko mezuez esnatu zen Algorta. "Gazte borrokaz presoak etxera" irakur daiteke oraindik kale kantoi eta hormetan agertutako pintadetan. "Beste behin ere errepresaliatuen aldeko konpromisoa agerian utzi du herriko gazteriak", adierazi du Algortako Herrira bilguneak. Gogoratu duenez, besteak beste, ekainean gazte mugimenduak egin zuen azken ostiraleko mobilizaziorako deialdia, euskal preso eta iheslari politikoak etxera ekar ditzatela eskatuz. Bitartean, Herrira mugimenduak urtarrilaren 12an Bilbon egingo duen mobilizazio erraldoiak herritar, eragile, sektore, profesional eta norbanako ezberdinen ekarpen gehiago jasoz doa. Azkenetarikoen artean, lau kontinente ezberdinetatik atxikimendu sindikalak jaso ditu manifestazioak. Argazkian, Basagoiti Etorbidean, Algortako batzoki parean agertutako pintada.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun