Bi larunbat barru, abenduaren 15ean, euskal preso eta iheslari politikoen eskubideen aldeko herri bilgunea aurkeztuko dute Erandion. Hitzordua 13:00etan izango da, udaletxeko erakusketa gelan. Donostiako Kursaaleko agertokian egindako ekitaldiaren bitartez aurkeztu zuten otsailaren 5ean Herrira mugimendua, aurreko hilabetetan Egin Dezagun Urratsa eta Egin Dezagun Bidea plataformek azken hilabeteetan egin duten lanaren eta gogoetaren ondorioz. Ordutik, bilguneak sortuz joan dira herriz herri, baita gure eskualdean ere. Tartean, Algortan, Itzubaltzeta / Romon, Leioan, Plentzia-Gorlizen, Sopelan, Urdulizen, unibertsitate mailan; eta orain, Erandion. Baina, aurkezpenaren aurreko egunetan ere izango dira ekitaldiak. Asteazkenean, hilak 12, bost euskal preso politikori buruzko "Barrura begiratzeko leihoak" dokumentala proiektatuko dute, 19:30ean, udaletxeko erakusketa gelan. Eta ostiralean, hilak 14, beste horrenbeste egingo dute, 20:00etan, Kalezulo gaztetxean. Egun Erandioko presorik ez dago Espainia edo Frantziako kartzeletan. Argazkian, 2009ko urtarrilaren 18an, 230 bat lagun batu ziren Erandioko Astrabudua auzoan Jon Bilbao Moro presoa eta bere senideak omentzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun