Txapelketa gastronomikoak ahuntzaren gauerdiko eztula ez direneko seinale garbia utzi dute Gorlizkoaren antolatzaileek. Izan ere, arauak zehatz-zehatzak dira. Lehiaketara aurkeztuko diren eltzeek bi kilogramo barraskilo izan beharko dituzte. Saltsa, jakina, egunean eta plazan bertan epaileek jarritako gunean egin beharko dute. Erregaia motak ere mugatu egin dituzte, egurra debekatu egin dutela. Butano botilak edo spray-ek hornitutako sukaldeak edo barbakoak izango dira aukeran. Bestelako tresnak libre utzi dituzte norberak bereak eroan beharko dituela. Azkenean, lehiakideek nahi beste lapiko egin ahal izango dituzte, baina bakarra aurkezteko eskubidea izango dute. Hori 13:30ak baino lehen izango da. Epaileek erabaki irmoa handik hiru ordu laurdenetara iragarriko dute.
Irabazleak txapela, lapikoa eta garaikurra eskuratuko ditu. Bigarrenak eta hirugarrenak, berbera, txapela izan ezik. Gainera, lehen hamar sailkatuek hainbat sari izango dute. Horrezaz gain, Gorlizko merkatarien elkarteak otarraintxoak dastatzeko aukera emango die Eliz plazatik igarotzen direnei.
Andre Maria Sortzez Garbiaren eguna ospatzeko asmoz, hainbat ekitaldi prestatu ditu biharko, larunbata, Gorlizko Udalak. Goizeko zortzietan hasita eta gaueko hiruak arte, jarduera anitz hartuko dituzte Eliz plazak eta pilotalekuak. Batetik, ohiko Gabonetako azoka egingo dute. Bestetik, bizkaitar eran prestatutako barraskilo txapelketa gastronomikoaren bosgarren edizioa jokatuko dute bertan. Azkenik, txikiek umeen parkea izango dute. Bitartean, 11:30ean egingo dute meza, Lirain abesbatza gorliztarrak abestuta. 12:30ean, berriz, 12 urtetik beherako umeentzako karakol lasterketa izango da. Bitartean, sariak 14:15ean banatuko dituzte. Arratsaldean, dantzatzeko aukera egongo da, 18:00etatik 21:00etara bitartean, DJ Jon Urbietak erromeria euskalduna eskainiko duela. Argazkian, barraskilo lapikoa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun