Gaur goizean egin dute lasterketaren aurkezpen ofiziala. Álvaro González Kirol zinegotziak nabarmendu du oroi-lasterketa herriko kirol ekitaldirik "herrikoiena" dela, parte-hartzeari dagokionez. “Urteari agur esateko modurik onena da, osasuntsua eta atsegina. Tradiziozko ekitaldia da, bere ibilbidean Getxon kirola, eta batez ere atletismoa, indartzen lagundu duena, eta horregatik lasterketa horrenganako Udalaren erabateko konpromisoa berretsi nahi dut”, azaldu du udal ordezkariak. Udalaren laguntzaren adierazgarri bezala, aurten Álvaro González buru duen Getxo Kirolak udal erakundeak herriko kirol elkarte desberdinetako kirolari federatuak lasterketan parte hartzera gonbidatu ditu. Bere aldetik, Itxartu taldeko Ricardo Ansotegik azaldu duenez, aurtengo aurreikuspena 2.300 inskripzioetara iristea da, iazko 2.010ak gaindituz. “Urterik urtera, guztion ahaleginarekin eta instituzioen eta babesleen laguntzarekin, %10 edo 15 bat handitu nahi dugu inskripzioen kopurua”, esan du.
Sariak
Sarien atalari dagokionez, antolakuntzakoek, bai gizonezkoei zein emakumezkoei, 600 euroko ohiko lehen sari nagusia emango diete, lasterketako marka ontzeagatik aparteko 600 eurokoaz gainera. 300 euroko saria izango da EAEko lehenengo atletarentzat eta 200koa Getxoko lehenengoarentzat. Bestalde, testigantza-proban parte hartzen duten 18 urtez azpikoentzat dominak eta garaikurrak izango dira, elastiko teknikoa lasterketa nagusian parte hartzen dutenentzat eta Getxo Kirolek bertako bizilagunen artean zozketatuko dituen zazpi sariak.
Txikigune zerbitzua
Azpimarratu beharreko beste nobedade bat da, antolakuntzakoek aurten Txikigunearen zerbitzua egokitu dutela, gurasoek lasterketan parte hartzen duten bitartean umeak jolasteko gunea izan dezaten. Txikigunea 10:00etatik 13:00etara egongo da zabalik eta 5 euro balioko du sarrerak.
Itxartuk 2.300 atleta batu nahi ditu aurtengo Itziar López de Uralde Oroi-Lasterketan
Itxartu taldeak egindako aurreikuspenen arabera, 2.300 atleta inguru bilduko ditu igande honetan, hilak 16, Algortan, XXIX. Itziar López de Uralde Oroi-Lasterketak. Ohi bezala, memorialak bi proba izango ditu, bata testigantzazkoa, lehiakorra ez dena, 2 kilometrokoa eta doakoa; eta bigarrena, lehiakorra dena, memoriala bera, 9 kilometrokoa, gazte mailatik beteranoetara biltzen dituena. Azken horretan parte hartzeagatik 5 euro ordaindu beharko dira. Inskripzio-kuota Caja Laboralaren bulegoetan ordaindu behar da. Izen ematea ostegunera arte, hilak 13, dago zabalik Getxo Kirolak udal erakundeak, Getxoko zein herrialdeko kirol saltoki batzuetan eta www.itxartu.com webgunean. Azken orduko inskripzioa ostiralean, abenduak 14, egin ahalko da Itxartu taldearen egoitzan (Algortako batzokia, 19:30etik 21:00etara, edo bere webgunean. Ordutegiei dagokienez, oroi-lasterketa 10:30ean hasiko da eta ordu erdi beranduago, 11:00etan, lehiakorra dena, Algortako Fadurako kiroldegiko eraikin nagusiaren aurrean hasi eta atletismo pistan amaituz. Gaur baieztatu dutenez, besteak beste, korrikalarien artean izango dira Iñigo de la Granja iazko txapelduna, David García, Francisco Javier Fontaneda beterano getxoztarra (Europako 10.000 metroko txapelduna, Europako 5.000 metroko txapeldunordea eta Munduko maratoi erdiko txapelduna), eta Imanol Marroquín. Eta nesken artean, Bizkaiko egungo atleta onenak, hala nola, Leire Medina, Iraia García, Belit Solar eta Cristina Petite olinpiko ohia. Argazkia, gaurko aurkezpen ekitaldia / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun