Gazte Asanblada Sopeloztarrak zabaldutako adierazpena:
Zer sentitu dozu frankismoa goraipatzen dauen jende multzo bat, zure nortasun eta eskubideak mespretxatuz zure herriko plazan agertuterakoan?
Hori bera sentitzen dugu guk gaur bezalako egun batean, abenduaren 6ean, iraintzen gaituen konstituzio espainiar bat, jai egun behartua dela gogoratzean.
Amorrazio berdina eragiten digu gure herriko udaletxe azpitik pasa, gora begiratu, eta Espainiako tribunalen mehatxupean, Espainiar bandera inposatu izan zaigula gogoratzen dugun bakoitzean.
Zer gara ba euskaldunok konstituzio horretan, mapan oraindik konkistatzeke dagoen puntu ilun bat baino?
Frankismo garaira itzultzea da espainiar gobernuak guretzat nahi duena, haien inposaketa disimulatuen bidez, inor ez azaldatzea, umilatuak sentitzen garela ez aldarrikatzea, eta horrela, euskaldunon bizimoduetan inposaketak ohitura bihurtzea. Eta horela, gutxinaka, gure nortasuna ezabatzea.
Hau da nahi duten herri euskalduna: existitzen ez dena.
Gazte Asanblada Sopeloztarra
Joan den ostegunean, abenduak 6, Espainiako Konstituzioa eta bandera gorri-horiaren "inposizioa" salatzeko ekimena egin zuen Gazte Asanblada Sopeloztarrak (GAS). Sopela.net agerkari digitalak azaldu duenez, goizean goizetik, falangistak, erreketeak, epaile antidemokratikoak, guardia zibilak, militarrak eta "manolak", udaleriko kaleetatik ibili ziren herria "birkonkistatzen". "Gora Espainia" zioen pankarta eskuan hartuta eta Manolo Escobar abeslariaren kantak lau haizeetara zabalduz, irribarrea eta harridura sortu zuten sopeloztarrengan. Deialdia egiteko orduan EAJren jarrera kritikatu zuten Sopelan bandera espainolaren "inposizioa" ofizialki salatzeko ezetz esan zutelako eta Bilbon Iñaki Azkuna alkateak Espainiako Armadaren Garellano errejimenduari ofizialki omenaldia egin ziolako. Kalez kale ibiltzen ziren bitartean, auzokideei orritxo bat banatu zieten ekintzaren arrazoia azaltzen. Besteak beste, ondokoa aipatzen zuten: "Zer sentitu dozu frankismoa goraipatzen dauen jende multzo bat, zure nortasun eta eskubideak mespretxatuz zure herriko plazan agertuterakoan? Hori bera sentitzen dugu guk gaur bezalako egun batean, abenduaren 6ean, iraintzen gaituen konstituzio espainiar bat, jai egun behartua dela gogoratzean. Amorrazio berdina eragiten digu gure herriko udaletxe azpitik pasa, gora begiratu, eta Espainiako tribunalen mehatxupean, Espainiar bandera inposatu izan zaigula gogoratzen dugun bakoitzean". Argazkia: © Sopela.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun