Abenduko aparteko ordainsaria eman beharrean, ekainekoa aurreratuko die EHUk langileei
Berriro errektore aukeratu baino lehen, EHUko langileei "abenduko ordainsari osoa" emango diela adierazi zuen Iñaki Goirizelaiak. Unibertsitateko buruak, baina, ez zuen argitu unibertsitateak langileei Gabonetako aparteko soldata ordainduko zien ala ez. EHUko iturriek gaur zabaldu dutenez, Euskal Herriko Unibertsitateak jakinarazi berri die bere langileei abenduko aparteko ordainsariaren gainean hartu duen erabakia. Aipatu dutenez, "EHUk egiaztatu du unibertsitateak ez daukala Eusko Jaurlaritzak duen arau babesa (lege mailako araua) Estatuaren dekretu legeari aurre egiteko. Hala ere, badauka arau babes nahikoa nominen ordainketa aurreratzeko, 2013ko ekaineko eta abenduko aparteko ordainsariari dagokion zatian, betiere langileak data horretan izendapena edo kontratua izango badu". Abenduko aparteko soldata ordaindu beharrean, ekainekoa aurreratuko die EHUk langileei. Nahi ez duten beharginek bost eguneko epea izango dute horren berri emateko, abenduaren 12tik hasita, unibertsitatearen web orriaren bitartez. Argazkian, Goirizelaiak "murrizketak egingo dituela" salatu zuen ELAk hauteskundeak baino lehen.
"Nominaren aurrerapena egin eta datorren urteko ekaineko aparteko ordainsaria abenduan ordaintzea proposatu dugu. Nominaren aurrerapen hori unibertsitateko langile guztiek jasoko dute. Nominaren aurrerapena jaso nahi ez duten langileek horren berri eman beharko dute bost eguneko epearen barruan, abenduaren 12tik hasita, unibertsitatearen web orrian horretarako jarri den mekanismoa erabilita. Konstituzio Auzitegia abenduko aparteko ordainsaria ordaintzearen alde agertuko balitz, nominaren aurrerapena berdindu edo kitatu egingo zaie epaiaren babesa lortuko luketen langile taldeei", azaldu dute EHUko iturriek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun