“A ze bikotea, pintxoa eta potea!” lelopean, GetxOnegin, IV.Pintxo Lehiaketa izango da asteburu honetan, abenduak 15 eta 16, Getxoko Udalak antolatutako Euskal Kulturaren XIV. Jardunaldien barruan. Udalerri osoko 44 establezimenduk parte hartuko dute (iaz baino hiru gehiagok) "ostalari eta bezeroen arteko harremanak euskaraz izatea sustatu nahi duen, hau da, ostalaritza eta euskara uztartu nahi duen lehiaketan". Aldi berean, "ostalariek euskara kalitate gehigarritzat hartzea lortu nahi da", udal iturriek gaineratu dutenez. Horrela, asteburuan zehar, parte hartzen duten tabernek euro batean salduko dute prestatutako pintxoa eta, aldi berean, publikoa botoa ematerakoan, euskarazko hitz ederren lehiaketan parte hartzera animatuko dute ere bai. Aurten gainera, lehenengo aldiz, botoak eta hitz ederrak SMS bidez ere eman ahal izango dira, aurreko urteotako txartelen sistema erabiltzearekin batera. Pintxoak larunbat goizean, arratsaldean edo/eta igande goizean dastatu ahal izango dira (establezimendu bakoitzak aukeratuta), Musika Eskolako folklore taldeko eta Bizkaiko Kantuzaleen elkarteko hainbat kidek giroa alaitzen duten bitartean. Argazkian, Itzubaltzeta / Romoko 21 tabernek 2012ko azaroaren 29an abiatu zuten Pintxo Potea ekimena / © Getxoko Udala.
Oraingoan, hitz ederren lehiaketan, bezeroen artean sari gehiago banatuko dira, udalerriko hainbat komertzioren laguntzari esker. Hain zuzen ere, boto-txartelekin parte hartzen dutenen artean 8 sari banatuko dira, eta SMS bidez parte hartzen dutenen artean beste hiru gehiago. Pintxoei dagokienez, aurrekoetan bezala, hiru sari nagusi eta bi aipamen berezi erabakiko dituzte adituek osatutako epaimahaiak eta publikoak, hau da, epaimahaiarena, bezeroena eta hizkuntza paisaiarena, euskararen erabilera egokiena duen establezimenduarena. Aipamenak Eusko Labeldun pintxorik onenarentzat eta pintxo tradizional goxoenarentzat izango dira. Aurten, GetxOnegin-en parte hartzen duten establezimenduen kanpoaldean hiru puxika handi egongo dira identifikatzeko. Bestalde, nahi duten guztiek kamisetak euskaraz idatzitako hitz eder batekin inprima ditzakete deskontu batekin, ekimenarekin bat egiteko. Informazio guztia udal weg gunean dago ikusgai www.getxo.net/euskara helbidean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun