Nekazaritzaren festa bilakatuko da igandean Leioako erdigunea

Ukberri 2012ko abe. 14a, 16:34

Leioak bere nekazari sustraietan atzera egingo du igande honetan herriaren erdigunean egingo duten Nekazari eta Abeltzaintza Azokaren 25. edizioaren bitartez. Ospakizun berezi horrek gero eta bisitari gehiago biltzen ditu, Bulebarrean eta Jose Ramon Aketxe zein Errekalde plazetan. Horrenbestez, 10etatik 15:00etara, Euskal Herriko hainbat toki desberdinetik etorritako dozenaka ekoizleren produktuak egongo dira ikusgai eta dastagai. Bestalde, betiko arraza eta animaliak izango dira Leioan: behiak eta idiak, Bulebarrean; eta zaldiak, ahuntzak eta hegaztiak, Errekalde plazan. Goiza alaitzen, Errekalde Nagusien Etxeko abesbatza, trikitilariak eta txistulariak ibiliko dira. Idi-gurdian igo nahi duenak, berriz, Bulebarrera hurbiltzea besterik ez du izango. Berbalamiñe euskara elkarteak ere azokan parte hartuko du, 12etan Libano tabernatik abiatuko den Kantu Poteoa antolatu duela. Euskaltzale oro gonbidatu dute eztarria berotzera. Argazkian, abelburuak ere izango dira Leioako Nekazari eta Abeltzaintza Azokan / © Leioa.net.

Azoka 10etan zabaldu eta ordu bete hasiko dira bestelako jarduerak, Gure Ohiturak dantza taldearen emanaldia kasu.Ordu horretatik aurrera, Errekalde plaza txikientzako topagune izango da, hainbat tailer eta ponien ibilbideak egongo baitira. Bestalde, toki berean, herri kirolen erakustaldia izango da, eguerdian. Ordu berean, “Leioako Elizateko Udala” izeneko lehiaketari helduko zaio txanda. Horretan, Idiazabal Jatorrizko Izendura duen Bizkaiko gaztarik onena sarituko dute, Bulebarrean; eta gazta probatzeko aukera ere egongo da. 12etan ere, Jose Ramon Aketxe plazan, Eusko Labela duen txerri errea dastatu ahal izango da. Eguerdiko ordu batean, Bulebarrean, behi eta idi arraza ezberdinei buruzko azalpenak emango dira: bakoitza zein den eta ze ezaugarri dituen azalduko zaie herritarrei. Azkenik, ordu bete beranduago, gazta lehiaketaren sari banaketa izango da eta azokaren girotzean eta dekorazioan parte hartzen dutenen sailkapena ere publiko egingo da.

Azokaren egitaraua

• 10:00etan, zokari hasiera eman.
• 11:00etan, euskal dantzak Gure Ohiturak taldearekin, Errekalde plazan.
• 11:00etan, idi-gurdi erakustaldia eta paseoak, Bulebarrean.
• 12:00etan, herri kirolak, Errekalde plazan. Harri-jasotzaileak: Izeta III – Urko / Urrutia – Urpe (125 kiloko harri zaharragaz – zilindrikoa)
• 12:00etan, Errekalde Nagusien Etxeko abesbatza, Bulebarrean.
• 12:00etan, “Leioa Elizateko Udala” Idiazabal Gazta Jatorrizko Izendapenaren Bizkaitar Produktoreentzako XIV. Lehiaketa. Gazta dastatzea.
Aitabitxi – Amabitxiak: Andrak elkartea.
• 12:00etan, txerri errea eta sagardo dastatzea: Eusko Label – Kalitatea, J.R. Aketxe plazan.
• 13:00etan, Errekalde Nagusien Etxeko abesbatza. J.R. Aketxe plazan.
• 13:00etan, azokan egongo diren behi eta idi arraza ezberdinetarako azalpenak, Bulebarrean.
• 14:00etan, Gazta Lehiaketaren Sari Banaketa. Postuen eta partaideen girotze lehiaketaren Sari Banaketa.
• 15:00etan, azokaren amaiera.

Goiz osoan zehar

• Trikitilariak eta txistulariak.
• Haurrentzako tailerrak, Jose Ramon Aketxe plazan.
• Poneyak eta gurdi paseoak, Errekalde plazan
• Idi-gurdia, Boulebarrean.
• Abere erakustaldia, Bulebarrean (behiak eta idiak) eta Errekalde plazan (zaldiak, ahuntzak eta hegaztiak).
• Produktuen erakusketa, dastaketa eta salmenta, Bulebarrean, J. R. Aketxe plazan eta Errekalde plazan.

Kantu Poteoaren kartela

Kultura Leioa

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!

Izan zaitez HIRUKAlagun