Ehun bat lagunek eskatu diote Kutxabanki berangoztar baten etxe-desjabetzea gelditzeko
Etzidamu, astelehenarekin, Berangon sei urtez eman zituen Beatriz Elena 38 urteko emakumea eta bere bi alabak kale gorrian geldi daitezke, Elenak Berangoko BBKrekin sinatu zuen 95.000 euroko hipoteka maileguagatik. Egun horretan, goizeko 10:30ean, Burgosko Villarcayo epaitegiak Elenak Medina de Pomar herrian duen etxebizitza aterako du enkantera, aurretik bere abokatuaren helegitea onartzen ez badu. Halere, egun KutxaBankek eskatzen dion zorra 99.749 eurokoa denez, etxeak ez luke kopuru osoa estaliko eta bankuak Elenari abala eman zioten Alacanteko lehengusuen etxea ere bahitu lezake. Gaur, 100 bat lagunek Elenari babesa agertu diote Bilboko Kale Nagusian, KutxaBankek duen egoitzaren aurrean. "Kaleratzerik ez!" lelopean, euskal banku publikoari bi urtez etxe desjabetzeak etengo zituela adierazi zuela gogorarazi diote eta hitza betetzeko eskatu diote. Berri-Otxoak plataformako kide batek salatu duenez, Beatriz Elena "negoziatzen saiatu da baina ez da egon aukerarik". Era berean, salatu dutenez, "bere kasua bi urteko luzamenduan ez dela sartzen esan eta ez dute inolako azalpenik eman nahi izan". Argazkian, gaurko agerraldia / cc-by-sa EH Bildu.
Bestalde, Irune Soto Bilduk Bizkaiko Batzar Nagusietan duen bozeramaileak gogor kritikatu du Aldundiaren geldotasuna: "onartezina da oinarrizkoenak diren eskubideen kontra jasaten ari garen eraso honen aurrean Bizkaiko Aldundiak inolako neurririk ez hartzea. Jose Luis Bilbao jaunari exijitzen diogu Aldundiak Kutxabanken dituen ordezkarien bidez etxegabetze politikak guztiz geldiarazteko bere esku dagoen guztia egin dezala eta etxebizitza eskubidea bermatzeko politikak ipini ditzala abian. Adibidez, Etxebizitza Foru Planak hutsi dituen etxebizitzak alokairu sozialera bideratu ditzala".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun