Kopla txapelketan hiru aurkezle izango dira bertsolariei gaiak jartzeko: Imanol Epelde, Amaia Alberdi eta Xabi Aizpurua. Hiruna saio ere egin beharko dituzte: librean binaka, ofizioka binaka eta zuzeneko musikaz lagunduta. Oskar Estanga musikaria, Eromerian taldeko bi trikitilari eta Jurdana Otxoa biolin-jotzaileak jarriko dituzte koplariak dantzan. Txapelketak hiru fase izango ditu. Lehenengoan hamarrek abestuko dute, bigarrenean soilik lehenengo sei sailkatuak. Fase horretan, esaera zahar batekin kantatu beharko dute bertsolariek binaka. Azken fasean buruz burukoa izango da. Bertan hiru ariketa izango dituzte: librean binaka, bakarka objektu bat emanda eta ofizioka. Urtero legez, publikoak erabakiko du unean-unean txapelketako zati bakoitzean nortzuk egingo duten aurrera eta baita zintzarria nori eman ere. Boto-paperak izango dute horretarako.
Aurreko zintzarridunak honakoak izan dira: 2007an, Maddalen Arzallus; 2008an, Igor Elorza; 2009an, Julio Soto; 2010ean, Amets Arzallus; eta 2011n, Beñat Gaztelumendi. Irabazlea hurrengo ediziora gonbidatzen dute, baina oraingoz ez du inork birritan irabazi.
Internetez entzun ahal izango da Fredi Paya gaurko Zarauzko Kopla Txapelketan
Bihar Bizkaiko Bertsolari Txapelketaren finalean bertsoka aritu aurretik, gaur, bezperan, koplaka abestuko du Fredi Paya algortarrak. Izan ere, gaur, 22:00etatik aurrera, Zarauzko Putzuzulo gatzetxean jokatuko da VI. Kopla Txapelketa eta bertan izango da Uribe Kostako bertsolaririk zirikatzaileenetarikoa. Dena den, hamar bertsolari izango dira taula gainean zintzarri saria lortu nahian. Payaz gain, iazko irabazlea izan zen Beñat Gaztelumendi añorgarra, Jon Maia zumaiarra, etxean jokatuko duen Nahikari Gabilondo zarauztarra, Aitor Sarriegi beasaindarra, Patxi Iriart hiriburuarra, Oihane Perea gasteiztarra, Unai Iturriaga durangarra, Maddi Ane Txoperena hendaiarra eta Alazne Untxalo iturendarra. Zarautzeraino hurbiltzerik ez dutenek, joaterik ez dutenek, Arraio irratiaren bidez jarraitu ahal izango dute saioa zuzenean, www.arraio.net webgunean. Argazkian, Fredi Paya Bizkaiko txapelketako Mungiako kanporaketan / cc-by-nc-nd Bizkaiko Bertsozale Elkartea / UKBERRI.NET.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun