Bihar hasiko da campusean Akme 012, kostu gutxiko artearen topaketa

Erabiltzailearen aurpegia Ukberri 2012ko abe. 17a, 15:48

"Low cost (kostu gutxi), emaitza bikainak" izenpean, bihar, asteartea, abiatuko dira EHUko Arte Ederretako Fakultatean Akme 012 jardunaldiak, diru gutxiz aritzen diren artistak protagonista izango direla. Ivan Argotek eta Isidoro Valcarcel Arte Plastikoen Espainiako Sariaren 2007ko irabazleak irekiko dute egitaraua goizeko 10etan fakultateko gradu aretoan. Laugarren edizio honetan, ikasleei arte garaikidearen ikuspuntu hurbila emateko konpromisoa hartu du ekimenak eta unibertsitatera hurreratuko dituzten artistak erakutsiko dituzte beraien berezitasunengatik bertako ikasketa programetan sartzen oso zaila diren praktika artistikoak. Aurreko edizioetan bezala, ikasleek jardunaldietan parte hartzea ere helburu nagusia du Akme 012k. Hori dela eta, ekitaldia antolatzearen prozesu osoa ikasleek, ikasle ohiek eta irakasleek osaturiko talde baten eskuan egon da. Izan ere, talde honek Akme 012 eratu du eta hitzaldiak, tailerrak eta aurkezpenak proposatu ditu. Argazkian, Igor Rezola Iztuetak Donostian egindako performance baten irudia / © Igor Rezola - The Wall Project.

Asteartetik ostegunera arte, hitzaldiak eta zuzeneko aktibitateak egiten ibiliko dira: Isidoro Valcarcel Medina (Murcia, 1937), 2007ko Arte Plastikoen Espainiako Saria eskuratu zuena; Ivan Argote, artista kolonbiarra, gaur egun Parisen bizi dena; Nuria Güell artista katalana; Igor Rezola graffitigilea; Maria Cañas, Animalario TVko zuzendaria, edukiak birzikaltzen eta bereganatzen duena; Dalila Gonçalves portugaldarra eta DJ Crazy Palmera. Akme jardunaldiak bi urtean behin antolatzen dira.

Lehenengo edizioan objektuak produzitzen ez dituzten artistek parte hartu zuten, beraien lan prozedurak eta baliabideak hitzaldi eta tailerretan landuz. 2006. urteko jardunaldietan lan metodologia bera jarraitu zuten baina garai horretan sortzeko eta zabaltzeko bitarteko ez ohikoak ardatz nagusitzat hartu zuten. Era berean, 2008ko abenduan “Zabor-Kultura” deritzona abiapuntutzat hartu zuten jardunaldiek. Azkenik 2010ean, esparru publikoaren kudeaketa eta interbentzioen inguruan aritu ziren.

Akme 012ko egitaraua

Abenduak 18, asteartea

• 10:00-12:00. Aurkezpena: Ivan Argote, Arte Ederretako fakultateko gradu aretoan.

• 12:00-14:00. Hitzaldia: Isidoro Valcarcel Medina, Arte Ederretako fakultateko gradu aretoan.

• 20:00-8:00. Tailerra: Pijama Sessions, Ivan Argoterekin, Arte Ederretako fakultateko gradu aretoan.

Abenduak 19, asteazkena

• 10:00-12:00. Hitzaldia: Nuria Güell, Arte Ederretako fakultateko gradu aretoan.

• 12:00-14:00. Hitzaldiak:
Mawatres eta Igor Rezola, Arte Ederretako fakultateko gradu aretoan.

• 16:00-20:00. Mawatres, Bilbon.

• 19:00-19:00 (abenduaren 19tik 20ra). Igor Rezola,
Consonni-ren lokalean, Mirasol Kontea 13 (Kortesen kale-kantoian), Bilbon.

Abenduak 20, osteguna

• 10:00-12:00. Hitzaldia: Maria Cañas, Arte Ederretako fakultateko gradu aretoan.

• 12:00-13:30. Hitzaldiak: Dalila Conçalves, Arte Ederretako fakultateko gradu aretoan.

• 13:30. Dj Crazy Palmera eta MHvjs, Arte Ederretako fakultateko sarreran.

Abenduak 21, ostirala

• Munduaren bukaera, San Tomas, Bilbon.

Igor Rezola Iztuetak Donostian egindako performancearen bideoa (© Igor Rezola - The Wall Project)

Igor Rezola "Dizebi" — Donostia from The Wall Project on Vimeo.

Kultura Leioa
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun