Gabonak bete ekimen jarri ditu martxan Getxoko Udalak

Erabiltzailearen aurpegia Ukberri 2012ko abe. 18a, 13:29

Atzotik eta urtarrilaren 5era bitartean, Gabonetarako jarduera ugari antolatu edota lagundu du Getxoko Udalak. Harrezkero, haur getxoztarrek eta haien sendiek Olentzeroren eta Erregeen Kabalgataren desfileak, tailerrak, pailazoak, kalejirak, erakusketak, azokak, kale animazioa, Gabonetako ohiko kontzertuak, kirol campusak edo udalekuak izango dituzte eskaintzan. Udalak zabaldutakoaren arabera ekimen "horietariko asko euskaraz egiteko aukerarekin". Imanol Landa Getxoko alkateak laburbildu duenez, gure hizkuntzan eskainiko dira "14 kirol campus (saski baloia, gimnasia erritmikoa, futbola, bela…), Bapirukek antolatutako koloniak, 11 kontzertu udalerriko parrokiatan, erakusketak, besteak beste Bizkaia Zubian, Getxolandia, Izotz Pista edo Gabonpasak programaren barruan ospatuko den jarduera ugari". Argazkian, Algortako izotz pista / © Getxoko Kultur Etxea.

Ekimen horien xedeak "lan bizitza eta familiarra bateratzen laguntzea, tokiko merkataritza bultzatzea, merkataritzako jarduera dinamizatzea eta euskararen erabilera sustatzea" dira, tokiko iturrien arabera. "Laburbilduta, gure udalerria bizirik eta dinamikoa mantentzera laguntzean datza, bai getxotarrei bai udalerrira hurbiltzen direnei kalitatezko eskaintza emate eta kontziliazioa eta astialdia errazte aldera. Horretarako, esfortzu handia egin dugu, batez ere bizi dugun une latza kontuan harturik, baina esfortzu horrek pena merezi duelakoan gaude, oso aberasgarria suertatzen delako, jakin badakigulako, herritarren arteko elkarbizitza eta harremanak errazten dituela eta hori guztion onura izaten dela" azaldu du Landak ekitaldien programaren aurkezpenean.

Olentzero herri ekimenez, Erregeak txekez

Ekitaldien antolakuntzan udalerriko hainbat euskara, kultur eta jendarteko elkartek zein Udaleko sail askok eta erakunde autonomoek hartu dute parte, horien artean, Euskarak, Inmigrazioak, Lankidetzak, Getxolanek, Gazteriak, Musika Eskolak, Getxo Kirolek eta Kultur Etxeak. Koldo Iturbe Euskara eta Kulturarako zinegotziak azpimarratuko du herri eragileen partaidetza: "ezinbestekotzat jotzen dugu eta horregatik beren esfortzua eta lana balorean jarri nahi ditugu" azaldu du. Ildo horretan, Olentzeroren etorrera eta horren inguruan antolatutako jarduerak hainbat egunetan izango dira, ohiko kalejirez gain, tailerrak, pailazoak, ikuskizunak eta abar izango baitira, batzorde desberdinek antolatuta, Udalaren babesarekin. Batzorde horietan udalerriko elkarte eta kolektibo ugarik hartzen dute parte, esate baterako, Horra, Horra! Algortako Olentzero batzordeak, Berantzagi dantza taldeak, Itxas Argia dantza taldeak, Zasi Eskola dantza taldeak, Ziztu Bizian, Itzubaltzeta / Romo eta Pinuetako jai batzordeak, Txatxalin Gobelako gurasoen elkarteak, Neguriko Gobela Taldeak eta Bizarra Lepoan elkarteak. Errege Magoen kabalgata, ordea, Getxoko Kultur Etxeak kontratatzen du.

Bestalde, Udalak azpimarratu du Areetako Kukupraka Ludotekak eta Algortako Gauegun Gaztelekuak eskainiko duten zerbitzu bereziekin batera, aurten, berritasun bezala, Kultur Etxeak jolasak eta tailerrak antolatuko dituela txikienentzat. Eta horri Getxolanen eskutik izango den kale animazioa (besteak beste, Getxopariekin) gehitu behar da. Getxolandia Areetako Xake plazan eta Izotz pista Algortako Biotz Alai plazan ostegunean, abenduak 20 zabaldu eta urtarrilaren 5era arte egongo dira zabalik.

Gabonpasen eta Olentzeroren egutegiak



Gabon kontzertuen egutegia




Kirol campusen egutegia

Jendartea Getxo
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun