Gaur, abenduak 21, batzarra egin dute Erandioko udal langileek, eta bertan udal osoko bilkurara sartzea erabaki dute, LAB sindikatuak jakinarazi duenez. Izan ere, gaurko sesioan udal langileei ordain-sarian egingo dieten kenketaren gaia jorratuko zen, eta, puntu horretara helduta, langileen bi ordezkarik hitza hartu dute eta adierazpen bat irakurri dute euskaraz eta erdaraz murrizketen aurka. Erandioko udal langileek salatu dutenez, "krisiaren iruzurra da aitzakia, aitzakia perfektua Zerbitzu Publikoak suntsitzeko, langileon eskubideak erasotzeko eta herritarrak babesa barik uzteko; guztion sosak kapitalaren eta interes pribatuen eskuetan jartzeko. Horrekin batera, birzentralizazioa da asmoa eta tresna: Madrilen erabakitzen dutena zintzo-zintzo betetzen duzue hemengo agintari gehienok. Horren erakusle da, hain zuzen, bilkura honetan berretsiko den erabakia: gure soldataren lapurreta". Horren harira, kritikatu dute ekaineko ordaina aurreratzeak ez duela abenduko "lapurreta" konpontzen. Argazkian, Erandioko udal langieek aurreko elkarretaratze batean.
"Gure soldata kendu diguzue, gurea da eta gura dugu, eta borrokatuko dugu hori berreskuratzeko eta gure lan-baldintzak eta zerbitzu publikoak defendatzeko. Horrez gain, salatu nahi dugu gobernu talde honen jokaera, negoziatu gabe, eta alde bakarreko erabaki bat hartuta, gure lan-hitzarmena urratu duzue", adierazi dute udal langile erandioztarrek. Beharginek "konbentzimendu osoa" daukate "borondate kontua" dela murrizketak ez ezartzeko gakoa; "jakin dakigun arren 'asmo onak' ez direla nahikoak". "Borondatea behar da, eta horrek gauzatu behar du gehiengoaren hitzarmen bat, gurean adostutakoa defendatzeko", amaitu dutenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun