Angela Casal Tubet gaixotasun luze baten ondoren zendu zen atzo. Itzubaltzetako Herrirak salatu duenez, "Kitxu"ren espetxe zigorra pairatzeaz gain, "18 urtez, sakabanaketaren biktima ere izan zen. Zoritxarrez semea libre ikusi gabe joan zaigu". Bestalde, astelehenerako espero dira hileta elizkizunak. Gonzalo Casal azken hamalau hilabetetan birritan ekarri izan dute gatibu itzubaltzetarra etxera, Villanublako (Valladolid) espetxetik, ama bisitatzera: bata 2011ko urriaren 14an eta bestea 2012ko martxoaren 21ean. Parot doktrina aplikatzen ez badiote, maiatzean da kalera irtetekoa "Kitxu".
Iñaki Gonzalo Casal "Kitxu", Getxo irratiko eta Egin irratiko kazetari izandakoa, 1994ko urriaren 25ean atxilotu zuten Areetako Bizkaiko Zubiko plazan, Andoni Muñoz urduliztarra, eta Algortako Iñigo Otazua "Oti" zein Angel Figueroarekin batera. Ekintzarik burutu ez zuen Lanbroa komandoko kideak izatea leporatu zieten lauei, 30 urteko zigorra ezarriz. "Kitxu"-k hainbat liburu idatzi ditu espetxean.
Bihar, larunbata, goizeko 8:30ean, Iñaki Gonzalo Casal "Kitxu" preso politiko itzubaltzetarrari Algortan "harrera berotsuena" egitera deitu du Itzubaltzetako Herrirak. Preso eta iheslarien aldeko taldeak zabaldu duenez, Gonzalo ordu horretatik aurrera espero dute Sarria tanatorioan, Algortako etorbideko 69 atariaren ondoan. Izan ere, Angela Casal Tubet "Kitxu"ren ama atzo iluntzean hil zen eta azken agurrerako ekarriko dute presoa Valladolideko espetxetik. Bada bihar, "une latz hauetan, lagun eta auzokideon elkartasun eta berotasuna sentitu dezan", "Kitxu"-ri animoak ematera deitu ditu auzokideak Itzubaltzetako Herrirak, beti ere "beste senide eta lagunekiko errespetu eta elkartasun osoz". Bestalde, igandean Valladolidera joateko autobusa bertan behera utzi du presoen aldeko taldeak. Argazkian, 2011ko urriaren 14an, Itzubaltzeta / Romoko Iñaki Gonzalo Casal "Kitxu" preso politikoa animo oihu eta txalo artean jaso zuten auzokideek. Gonzalo larri gaixorik zegoen ama bisitatzera eraman zuen Ertzaintzak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun